Ուրբաթ օրը «Տաշիր գրուպի» վերանորոգած այգում մեծ հավաք էր կազմակերպվել՝ ի պաշտպանություն այդ նույն այգին կարգի բերած բարերար ու գործարար, այս օրերին եկեղեցուն պաշտպանելու համար կալանավորված Սամվել Կարապետյանի։
Միասնական աղոթքից հետո առաջինը բեմ բարձրացան հինգ եպիսկոպոսներ, այդ թվում՝ կաթողիկոս Գարեգին Բ-ի եղբայրը՝ Եզրաս Սրբազանը։ Նրանցից մեկը՝ Մասյացոտնի թեմի առաջնորդ Գևորգ եպիսկոպոս Սարոյանը բոլորի անունից ելույթ ունեցավ՝ իր աջակցությունը հայտնելով Սամվել Կարապետյանին։
«Կարծում եմ՝ բոլորդ կհամաձայնեք ինձ հետ, որ Սամվել Կարապետյանի անունը հայի կյանքում երբևէ չի կապվել քաղաքականության կամ քաղաքական գործընթացների հետ։ Նրան մենք գիտենք որպես ազգային բարերարի՝ մարդ, որը տարիներ շարունակ հեռևողական է եղել հայրենի տնտեսությունը զարգացնելու, նոր աշխատատեղեր հիմնելու գործում։ Սիրելիներ, գիտենք նաև, որ Սամվել Կարապետյանը մշտապես իր օգտակարությունն է բերել Հայ Առաքելական եկեղեցուն։ Նրա շնորհիվ մի շարք եկեղեցիներ են կառուցվել և վերանորոգվել»,- ասաց ելույթ ունեցող եպիսկոպոսն ու մի թեթև հիշեց նաև, որ այս օրերին իշխանության կողմից մասնավորապես թիրախավորվում է Հայ Առաքելական Սուրբ եկեղեցին՝ ողջ հոգևոր դասը, ներառյալ Ամենայն հայոց հայրապետը։
«Անգամ գործողություններ են ձեռնարկվել օրվա իշխանությունների կողմից՝ հեռացնելու Նորին սրբությանը իր օրինավոր գահից։ Վերստին հաստատում ենք, որ այս ամենը առաջին հերթին հակասահմանադրական է, հակասում է եկեղեցի-պետություն հարաբերության մասին օրենքին, խղճի ազատության օրենքին, ժողովրդավար պետություն ունենալու սկզբունքներին, և, ամենակարևորը, ինչպես քրիստոնեական, այնպես էլ հայոց եկեղեցու կանոնական իրավունքին և կարգին»,- նկատեց ելույթ ունեցող բարձրաստիճան հոգևորականը՝ ուրախությամբ մեջբերելով նաև ՄԻՊ-ի հայտարարությունը, որ պետք է բացառել հակաօրինական որևէ միջամտություն հայ եկեղեցու գործերին։
Առաջին հայացքից նորմալ էր ու տրամաբանական, որ եկեղեցականները պետք է և՛ մասնակցեին, և՛ իրենց խոսքը ասեին՝ ի աջակցություն խոշոր գործարարի, որն այս պահին ԱԱԾ «պադվալում» է բացառապես հենց իրենց՝ եկեղեցուն ու եկեղեցականներին սատարելու համար։
Բայց Սամվել Կարապետյանի հետ կողքի խցում են գտվում նաև երկու հանրահռչակ եպիսկոպոսներ՝ Բագրատ և Միքայել Սրբազանները։ Ճիշտ է, նրանք Սամվել Կարապետյանին աջակցելու համար չէ, որ կալանավորված են, բայց թե՛ նրանց, թե՛ Սամվել Կարապետյանին իշխանությունները փորձում են մի փաթեթով դատել՝ եկեղեցական լինելու կամ եկեղեցուն աջակցելու համար, պարզապես այդ ամենը ձևակերպել են իրենց ճաշակով՝ «ահաբեկչական խմբավորման անդամներ»։
Հետևաբար, միանգամայն ընկալելի էր, որ ուրբաթ օրը բեմ բարձրացած եպիսկոպոսները պետք է Սամվել Կարապետյանից զատ ու նրա հետ միասին աղոթք հնչեցնեին կամ որևէ աջակցող խոսք ասեին նաև իրենց հոգևոր եղբայրների՝ այս պահին կալանավայրում զրկանքներ կրող Բագրատ արքեպիսկոպոս Գալստանյանի և Միքայել արքեպիսկոպոս Աջապահյանի համար։ Բայց ոչ մի խոսք նրանց մասին։ Ելույթ ունեցողը ընդամենը մի ընդհանրական նախադասություն ասաց իշխանությունների կողմից եկեղեցու դեմ իրականացվող արշավի մասին, որ թիրախավորվել է Հայ Առաքելական Սուրբ եկեղեցին և ամբողջ հոգևոր դասը, ու ոչ մի խոսք այս պահին գլխավոր զոհերի՝ կալանավորված սրբազանների մասին։ Վերջում միայն ասաց՝ «Աստված պահապան մեր եկեղեցուն և պետականությանը։ Ազատություն ազգային բարերար Սամվել Կարևապետյանին»։
Գևորգ եպիսկոպոս Սարոյանի ելույթից տպավորություն էր, թե միայն բարերար Կարապետյանն է կալանավորված, իրենց հոգևոր եղբայրներն այս պահին Սամվել Կարապետյանի կողքի խցում չեն ու չեն հալածվում այս իշխանությունների կողմից։ Իհարկե, հավաքը Սամվել Կարապետյանի համար էր և նրա հարազատների կողմից էր կազմակերպված, կոպիտ ասած՝ հավաքի կազմակերպման փողը Կարապետյանն էր տվել, բայց միայն նա չէ կալանավորված, նրա հետ մեկտեղ նույն թեմայով ու նույն մեղադրանքով նաև երկու Սրբազան հայրեր են կալանավորված։
Մոռացա՞ն այդպես շուտ, թե՞ ավելի վատ՝ ուրացան իրենց եղբայրներին Հայ Առաքելական եկեղեցու՝ դեռևս ազատության մեջ գտնվող և դեռ փաշինյանական ռեժիմի կողմից ուղիղ չհալածվող հոգևորականները։ Իսկ գուցե իրե՞նք էլ են, այս իշխանությունների նման, համարում, որ Բագրատ և Միքայել Սրբազաններն, իրականում, ահաբեկիչ են և ուզում էին պետական հեղաշրջում անել, ուստի լավ կլինի՝ գոնե այս փուլում հեռու պահեն իրենց այդ երկու «ահաբեկչից», ասել է թե՝ անցնեն ջրի հատակը, մինչև անցնի վտանգը։
Վահե Մակարյան