Նիկոլ Փաշինյանը շարունակում է ստատուսներով եկեղեցու դեմ գրոհը, այս առավոտ նա կրկին անդրադարձավ Մայր Աթոռին և Վեհափառին․
«Վաղարշապատ խոշորացված համայնքի որեւէ տարածք չի կարող իրավապահների գործունեության համար փակ լինել...»,- մասնավորապես գրել է Փաշինյանը։ Վերջինիս բառապաշարը և անհարիր ու խայտառակ ձևակերպումները բաց ենք թողնում՝ դրանք ավելորդ անգամ չտիրաժավորելու համար:
Ավելի վաղ MediaHub-ը գրել էր, որ Միքայել Սրբազանի հետևից Մայր Աթոռ ուղարկված ԱԱԾ-ականներն ու ոստիկանության տարբեր ստորաբաժանումների ներկայացուցիչներ հրաժարվել էին ուժ կիրառելով վերջինիս բերման ենթարկել, հրաժարվել էին հավաքված հազարավոր քաղաքացիների և հոգևորականների դեմ ուժ կիրառել: Սա, հասկանալի է, Փաշինյանը չէր կարող մարսել և այսօր, ահա, նա հստակ հրահանգ է իջեցրել գրոհել վեհարանը:
Ի՞նչ են մտածում այս հրահանգի մասին Մայր Աթոռում. MediaHub-ը կապ հաստատեց Մայր Աթոռ Սուրբ Էջմիածնի տեղեկատվական համակարգի տնօրեն Տեր Եսայի քահանա Արթենյանի հետ։
Վերջինս լակոնիկ պատասխան տվեց. «Առանց մեկնաբանության»:
MediaHub-ի աղբյուրները հայտնում են, որ հոգևոր դասը փաշինյանական իրավապահներից ամեն ինչ էլ սպասում է, և նման զարգացում էլ կանխատեսելի է:
Հիշեցնենք, այս պահին երկու սրբազան հայրեր՝ Բագրատ Գալստանյանն ու Միքայել Աջապահյանը ԱԱԾ մեկուսարանում են, նրանք կալանավորված են երկու ամիս ժամկետով:
Հիշեցնենք, այս իշխանությունը Շիրակի թեմի առաջնորդ Միքայել Սրբազան Աջապահյանին մեղադրում է 2025 թվականի հունիսի 21-ին «իշխանությունը զավթելուն ուղղված հրապարակային կոչ» հնչեցնելու մեջ, իսկ Բագրատ Սրբազանը մեղադրվում է ահաբեկչություն, զանգվածային անկարգություններ եւ իշխանության բռնազավթում նախապատրաստելու համար։
Մարիաննա Արամյան