Այս պահին իմ կարգավիճակում որևէ փոփոխություն չկա, այսօր փաստաբանս պետք է զբաղվի այդ հարցով՝ տեսնենք, թե ինչ պատասխան են տալիս: Այս մասին MediaHub-ի հետ զրույցում ասաց քաղաքագետ Կարեն Իգիթյանը, ում մուտքը երկու օր առաջ Հայաստան արգելվել է:
«Բայց ես վստահ էլ չեմ, որ այսօր պատասխան կտան»,- ասաց նա:
Հարցին, թե իր մուտքը ՀՀ արգելելը ինչո՞վ է պայմանավորված հենց այս փուլում, քանի որ Իգիթյանը նոր չէ, որ սկսել է քննադատել իշխանություններին, մեր զրուցակիցը նշեց, որ չի կարծում, թե դա կապված է իր գործունեության փոփոխության հետ, որովհետև փոփոխություն, որպես այդպիսին, չկա էլ. «Կարծում եմ, որ սա ավելի շատ կապված է ՀՀ գործող իշխանության մոտեցումների հետ, որոնք փոխվել են: Վերջին շրջանում իշխանության գործելաոճը ավելի ռեպրեսիվ է դարձել, մենք տեսնում ենք, թե Հայաստանում ինչ է կատարվում, ինչքան մարդ կա ձերբակալված, և հստակ է, որ նման բան 1937 թվականից հետո չէր եղել, երբ միանգամից երկու սրբազան և այլ եկեղեցականներ հիմա բանտերում են: Նման բան չի եղել ուղղակի»։
Ինչ վերաբերում է իրենց հետագա քայլերին, թե ինչ են պատրաստվում անել այս որոշման դեմ՝ դիմել դատարան, բողոքարկել ևս այլն, քաղաքագետը նշեց. «Դա կախված է նրանից, թե ինչ պատասխան կտան մեզ այսօր, պետք է հասկանանք՝ արժի՞ դատի տալ, թե՝ ոչ: Սպասենք, այս պահին անորոշ է»:
Հիշեցնենք, հուլիսի 5-ին Իգիթյանը ֆեյսբուքյան իր գրառմամբ տեղեկացրեց, որ իր մուտքը ՀՀ արգելվել է Պյատիգորսկից վերադառնալիս, որտեղ նա մասնակցել է «Կովկասյան երկխոսությանը» և խոսել արմատականության մասին, որը տարածում է Թուրքիան Կովկասում։
«Հայաստան ժամանելուն պես Ազգային անվտանգության ծառայության սահմանապահ զորքերը հայտարարեցին, որ ինձ արգելվել է մուտք գործել երկիր։ ԱԱԾ-ի և օդանավակայանի անվտանգության ծառայության համար հարցեր չկան. նրանք իրենց պահեցին հնարավորինս ճիշտ և պրոֆեսիոնալ։
Բայց կան հարցեր (հռետորական) Հայաստանի իշխող ուժերի համար։
Ո՞րն է արգելքի պատճառը։ Որովհետև ես լրատվամիջոցներում հանդես եմ եկել Հայ Առաքելական եկեղեցու պաշտպանության օգտի՞ն։ Կամ որովհետև խոսել եմ Թուրքիայի կողմից տարածվող արմատականության մասի՞ն։
Ես վերջին 16 տարիների ընթացքում ապրել և աշխատել եմ Հայաստանում։ Ափսոս, որ հիմա չեմ տեսնի իմ հարազատներին, դասախոս կոլեգաներիս, ընկերներիս և ուսանողներիս։
Դասախոսները կհասկանան, թե ինչն է հատկապես վշտացնող այս իրավիճակում. դուք անհանգստանում եք այն երիտասարդների համար, ովքեր սպասում էին մեր դասախոսություններին, ուզում էին գրել իրենց թեզերը իմ ղեկավարությամբ։
Ամեն դեպքում, սա վերջը չէ, այլ նոր փուլի սկիզբը։ Մենք կապի մեջ կմնանք», - գրել էր նա: