Ստեղծվել է մի կառույց, որի մասին որևէ բան չգիտենք։ ՀՀ շարքային քաղաքացին, թերևս, պետք էլ չէ, որ իմանա։ Բայց ես` որպես մարդ, որն ամբողջ կյանքում ծառայել է անվտանգության մարմիններում, որևէ բան չեմ տեսնում, որ մեր Հետախուզական ծառայությունն անում է։ Այս մասին «Sputnik Արմենիայի» հետ զրույցում ասաց «Հայրենիք» կուսակցության նախագահ Արթուր Վանեցյանը՝ պատասխանելով հարցին, թե ինչպես է գնահատում Արտաքին հետախուզության ծառայության ստեղծումը և դրա հետևանքով ԱԱԾ–ի դիրքերի հնարավոր թուլացումը:
«Որևէ մեկին չնեղացնելով և որևէ մեկի գիտելիքները չգերագնահատելով` եկեք մի պարզ հարց տանք ինքներս մեզ. Արտաքին հետախուզության ծառայության պետ նշանակված Քրիստինե Գրիգորյանը հետախուզության հետ ի՞նչ կապ ունի»,- ասաց նա։
Վանեցյանը նաև չի պատկերացնում, թե աշխատանքային ինչ մոդել է դրված նորաստեղծ այդ կառույցի հիմքում։ Ավելին` նրա համոզմամբ` նույնիսկ կառույցի ղեկավարությունն այդ հարցի պատասխանը չունի։
«Ասում են` երբ հարցրել են, թե ինչ մոդել եք ձեզ մոտ դնում, ԱՀԾ պաշտոնյաներն ինչ–որ ֆիլմերից օրինակներ են բերել։ Օրինակ` ուզում ենք Ջեյմս Բոնդի պես հետախուզական ծառայություն ունենալ։ Սա և՛ ծիծաղ է առաջացնում, և՛ շատ խորը մտահոգություն։ ՀՀ անվտանգային համակարգը, ցավոք, շատ վատ վիճակում է։ Իսկ անվտանգային համակարգը մի մարմին չէ և մի գործառույթ չէ, անվտանգային համակարգը իր ամբողջականության մեջ է էֆեկտիվ աշխատում, իսկ մենք այսօր ունենք խարխլված անվտանգային համակարգ»,– արձանագրեց Արթուր Վանեցյանը։