Նիկոլ Փաշինյանն ԱԱԾ–ն դիտարկում է որպես իր իշխանության պահպանման միակ երաշխավոր։ Այս մասին «Sputnik Արմենիայի» հետ զրույցում ասաց «Հայրենիք» կուսակցության նախագահ Արթուր Վանեցյանը:

Նրա խոսքով՝ իշխանությունն ունի «զրո» վարկանիշ։ 

«Իշխանությունը պահելու միակ հենքը իրավապահ համակարգն է։ Որ վայրկյանին իրավապահ համակարգը իշխանության տակից հանես, 5 րոպե հետո այս իշխանությունն այլևս չի լինի»,- ասաց նա:

Արթուր Վանեցյանը վստահ է՝ Նիկոլ Փաշինյանի վախերով է պայմանավորված նաև ԱԱԾ տնօրենների հաճախակի փոփոխությունը։ Նշենք, որ Փաշինյանի իշխանության 7 տարիների ընթացքում ԱԱԾ-ն 6 տնօրեն է ունեցել, վերջին նշանակումը տեղի է ունեցել հունիսի 28–ին, երբ ԱԱԾ տնօրենի նախկին տեղակալ Անդրանիկ Սիմոնյանը տնօրենի պաշտոնում փոխարինեց Արմեն Աբազյանին։

Ըստ մամուլի` Աբազյանի ազատումը կապ ունի գործարար Սամվել Կարապետյանի ձերբակալության հետ, քանի որ նա հրաժարվել է կատարել Փաշինյանի հրահանգը՝ «մասկի շոու» բեմադրել Կարապետյանի տան բակում և «փռել» նրան ասֆալտին։

Անդրադառնալով նորանշանակ տնօրենին` Վանեցյանը նախ արձանագրեց, որ ԱԱԾ համակարգը «դրսից մարդ չի ընդունում», մինչդեռ նոր տնօրենը, թեև որոշ ժամանակ աշխատել է որպես տնօրենի տեղակալ, բայց հենց «դրսից» էր եկել։ Այս հանգամանքը, նրա համոզմամբ, ազդելու է ծառայության աշխատանքի արդյունավետության վրա։

«ԱԱԾ այսօրվա տնօրենը ԱԱԾ–ում երբևիցե չի ծառայել, նշանակվել է անմիջապես տնօրենի տեղակալ, ընդ որում` օրենքի խախտմամբ։ Դրա մասին մամուլում եղել են հրապարակումներ։ Սիմոնյանը ԱԱԾ տնօրենի տեղակալ է նշանակվել` ունենալով կապիտանի զինվորական կոչում։ ԱԱԾ մասին օրենքում հստակ գրված է, որ ԱԱԾ տնօրենի տեղակալ կարող է նշանակվել գնդապետի կոչումից ոչ ցածր կոչում ունեցող անձը։ Բացի այդ, ԱԱԾ մարմիններում վերջին 3 տարում նա պետք է զբաղեցներ գլխավոր, կամ վերջին 5 տարում` բարձրագույն պաշտոն, ինչը Սիմոնյանի դեպքում չի եղել»,– նշեց նա։

Մամուլում պարբերաբար տեղեկություններ են հայտնվում ՀՀ ներկա իշխանությունների ներկայացուցիչների` այս կամ այն երկրի գործակալ լինելու մասին։ Արթուր Վանեցյանը վստահեցրեց, որ իր պաշտոնավարման տարիներին այդպիսի տեղեկություններ ԱԱԾ–ն չի ունեցել։

«Եթե նման բացահայտումներ լինեին, նրանք կլինեին դատապարտված։ Բայց այս իշխանությունների կատարած քայլերը մեզ կարող են հիմք տալ ենթադրելու, որ նրանք, այո, ինչու չէ, ուղղորդվում են օտարերկրյա հատուկ ծառայությունների կողմից։ Բայց փաստ, որին ես տիրապետում եմ, կամ տիրապետել եմ իմ պաշտոնավարման ժամանակ, չունեմ»,– ասաց Վանեցյանը։