Կարկառուն ՔՊ-ական Հայկ Կոնջորյանի հայտարարագիրը ուսումնասիրելով MediaHub-ը նկատեց, որ ինչպես և համանուն այս խմբակցության շատ անդամներ, նա ֆինանսական բարեկեցության է հասել 2018 թվականից հետո։
ՔՊ խմբակցության ղեկավարը մշտապես աչքի է ընկել իր կոշտ, հաճախ՝ սանձարձակ, պատգամավորին անհարիր բառամթերքով, Նիկոլ Փաշինյանի թեզերը ջանասիրաբար պաշտպանելով, և այդ ամենը բերել է իր ընտանիքի ֆինանսական կարգավիճակի կտրուկ բարելավմանը: Հիշում ենք՝ բոլորովին վերջերս Կոնջորյանի կինը «արդար մրցույթի» արդյունքում դարձավ «Հայփոստ»-ի տնօրեն, թեև մինչ այդ էլ նրա աշխատավարձը՝ շարքային աշխատակցի կարգավիճակում, կրկնակի-եռակի անգամ աճել էր:
Օրինակ, 2023 թվականի հայտարարագրի համաձայն, 2023-ի վերջին Շուշան Ալեքսանյանի բանկային հաշիվներին եղել է 10․3 մլն դրամ, 313 դրամ և 1․1 մլն դրամ գումար, կրիպտոարժույթ Ethereum՝ 13,725 դրամ և կանխիկ՝ 4,500,000 դրամ։ Պատգամավորի կնոջ եկամուտները 2023-ի վերջում կազմել են 12,5 մլն դրամ։
Սակայն վերադառնանք նրա ամուսնու հայտարարագրին: Եվ այսպես, ինչպես նկատում ենք 2024 թվականի անշարժ գույքի և եկամուտների մասին հայտարարագրից, Հայկ Կոնջորյանն ունի բնակարան բազմաբնակարան շենքում, և արդեն հաշվետու տարում ձեռք է բերել հողին ամրակայված անշարժ գույք, որը եղել է գնման եղանակով՝ 54 մլն դրամ արժողությամբ։
Կոնջորյանը որպես տրանսպորտային միջոց հայտարարագրել է 2017 թվականի արտադրության Toyota մակնիշի ավտոմեքենա, որն էլ գնել է 2022-ին։
Նրա բանկային հաշիվներից երկուսի մնացորդը հաշվետու տարվա սկզբում կազմել է 0 դրամ, որոնցից մեկը տարվա վերջում դարձել է 1 մլն 339 հազար դրամ, մյուսը՝ 230 դրամ։
Մյուսը երկուսի դեպքում հակառակ պրոցեսն է տեղի ունեցել՝ 219 հազար և 853 հազար դրամները զրոյացվել է։
Հայկ Կոնջորյանի էլեկտրոնային հաշիվը տարվա սկզբում կազմել է 2,777 դրամ, ինչը տարվա վերջում դարձել է 5,847 դրամ։
Որպես կանխիկ դրամ տարվա սկզբին հայտարարգրած 3 մլն-ը դարձել է 4 մլն դրամ։
ՔՊ պատգամավոր Հայկ Կոնջորյանի հաշվետու տարվա եկամուտը կազմել է 11 մլն 272 հազար դրամ, որից 10 մլն 162 հազար դրամը ԱԺ-ից ստացած աշխատավարձն է։ Նշենք, որ, օրինակ, 2022-ին նրա աշխատավարձը կազմել է 7 մլն 868,990 դրամ, իսկ 2023-ին՝ 9 մլն 950,080 դրամ։
Էմմա Մարտիրոսյան