ՀԷՑ տնօրենի ժամանակավոր պաշտոնակատար Դավիթ Ղազինյանից հետաքրքրվեցինք՝ այսօրվա հավաքին, եթե ՀԷՑ աշխատակիցներ էլ մասնակցեն, նրանց սպառնացող Փաշինյանը կարո՞ղ է ինչ-որ մեխանիզմով ազատել այդ մարդկանց աշխատանքից։ 

«Թեման ինքնին արդեն ի սկզբանե հորինված թեմա է՝ ուղղորդվել, քաղաքական խաղեր, չգիտեմ ինչ։ ՀԷՑ-ը միշտ զերծ է մնացել քաղաքականության մեջ լինելուց բոլոր ժամանակներում՝ և՛ 2018 թվականին, և՛ վերջին հինգ տարվա ընթացքում տեղի ունեցած բոլոր քաղաքական իրադարձությունների ժամանակ»,- MediaHub-ին ասաց Դավիթ Ղազինյանը։ 

-Վստա՞հ եք, որ 2018 թվականին զերծ է մնացել քաղաքական պրոցեսներից։ 

-100 տոկոս։ Ես այդ ժամանակ եղել եմ ՀԷՑ-ի Երևան քաղաքի տնօրենը և ամենայն պատասխանատվությամբ հայտարարում եմ, որ, լինելով տնօրեն, ո՛չ այս կողմ, ո՛չ այն կողմ որևիցե մեկին ո՛չ ուղղորդել եմ, ո՛չ պարտադրել։ Իսկ առանց ինձ ուղղակի հնարավոր չէր, անկեղծ Ձեզ ասեմ։ 

-Ինքնակա՞մ էլ չեն մասնակցել 2018-ի իրադարձություններին։ 

-Ինքնակամ․․․ Իսկ ո՞վ է ասում՝ ոչ։ Խոսքը նրա մասին է, որ ասում եք՝ վստա՞հ եք, որ չեն մասնակցել։ Ես խոսում եմ որպես կազմակերպություն, ես անհատների մասին չեմ խոսում, Սահմանադրությամբ անհատներն ունեն իրենց իրավունքը և իրենց իրավունքներն իրացնում են։ 

-Այսինքն՝ Ձեր «դաբռոյով», Ձեր ուղղորդմամբ կամ թույլտվությամբ որևէ մեկը այդ օրերին փողոց չի փակել։

-Ոչ միայն թույլտվությամբ, նաև ուղղորդմամբ կամ այլ միջոցներով չի եղել այդպիսի բան, ես դա Ձեզ 100 տոկոսով եմ ասում։ Ինչ վերաբերում է էս ժամանակահատվածում կատարվողին, մեր բազմաթիվ աշխատակիցներ հրավիրվել են ոստիկանություն, հարցեր են տվել նրանց, թե՝ ձեզ ինչ-որ մեկն ասե՞լ է, որ գնաք Սամվել Կարապետյանի տան մոտ, հետո՝ դատարան, ինչպես նաև շատ աշխատակիցների այս օրերին հրավիրում են ոստիկանություն զրույցի, որ հանկարծ չկազմակերպեք, չգնաք։ Հիմա ես՝ ինքս, հայտարարում եմ, որ եթե կլինի այնպիսի աշխատակից ՀԷՑ-ում, որը չի ցանկանա դիմել իրավապահ մարմիններին, իսկ ես պնդում եմ, որ դիմի, բայց ինքը չի ցանկանա, խնդրեմ, թող դիմի ինձ, և ես կպատժեմ էն աշխատակցին իրավական ձևով, որն ուղղորդում է կամ որը սպառնում է որևէ ցույցի մասնակցել։ 

-Իսկ ինքնակամ կարո՞ղ են գալ մասնակցել ի պաշտպանություն Սամվել Կարապետյանի քայլերթին, օրինակ, այսինքն՝ Դուք նրանց ձեռքը չե՞ք բռնի ու ասեք՝ «մի՛ գնացեք»։ 

-Ճիշտն ասած, եթե ես ասեմ՝ ձեռքը բռնելու ենք, կհավատա՞ք։ Իհարկե, ոչ։ Ինքնակամ որևէ գործողության որևիցե անգամ ՀԷՑ-ը չի ընդդիմացել, չի սպառնացել, չի ուղղորդել։ Եւ ամենակարևորը՝ այսպիսի գործողություններ անելիս իրենք շատ լավ հասկանում են, չէ՞, որ եթե մի դեպք ունենային, հիմա ինչ սարքած կլինեին։ Լավ, ժողովուրդ ջան, պաշտոնյա եք, տղամարդ եք, ունե՞ք էդպիսի դեպք, ասեք՝ էսինչը էսինչին ուղղորդել է, սպառնացել է, եթե չունեք, գոնե մի խոսեք։ 

Վահե Մակարյան