Մամուլում այսօր լուրեր տարածվեցին, որ ՀՖՖ-ում կրճատումներ են․ վատ արդյունքների մեղքն աշխատակազմի վրա են բարդում։ 

Ըստ աղբյուրի՝ հուլիսի 3-ին ՀՖՖ փոխնախագահ Արմեն Նիկողոսյանը հավաքել է աշխատակազմին, այդ թվում՝ բժիշկներին, և նախազգուշացրել է, որ աշխատանքից ոմանք կազատվեն, քանի որ վատ են աշխատում։ Աշխատակիցները ազատումների մասին շշուկներ վաղուց են լսում, բայց հիմա առավել պարզորոշ է դարձել և, ըստ լուրերի, մոտ 10-15 աշխատակցի հարցն է լուծվելու: 

Ինչո՞ւ է նման որոշում ընդունվել, արդյո՞ք կան հիմքեր՝ ՀՖՖ-ում նման կրճատումների գնալու․ MediaHub-ը փորձեց պարզել՝ զրուցելով ՀՖՖ Արմեն Նիկողոսյանի հետ։

Վերջինս նախ հրաժարվեց պատասխանել մեր հարցերին՝ նշելով, որ ՀՖՖ լրատվականից ճշտենք մեզ անհրաժեշտ տեղեկատվությունը։ Այնուամենայնիվ, մենք կարճ զրույց ունեցանք Արմեն Նիկողոսյանի հետ, որը ներկայացնում ենք ստորև։

-  Պարոն Նիկողոսյան, մամուլում լուրեր են տարածվել, որ ՀՖՖ-ում կրճատումներ են, և վատ արդյունքների մեղքն աշխատակազմի վրա է բարդվում։ Ինչպե՞ս կմեկնաբանեք այս լուրերը։

-  Խնդրում եմ զանգել մեր մեդիա կենտրոն։

-  Ո՞ւմ հետ պետք է խոսենք, եթե ժողովը հրավիրել եք Դուք և հենց Դուք եք կրճատումների մասին խոսել։

-  Դա ի՞նչ կապ ունի, դիմեք մեր մեդիա կենտրոն։

-  Այսինքն՝ Դուք Ձեր արած հայտարարության հետ կապված մեկնաբանություն չունե՞ք, եթե, իհարկե, կրճատումների մասին նման հայտարարություն եղել է։

-  Այսինքն՝ ես Ձեզ պետք է մեկնաբանություն տա՞մ։ Կամ էդ ի՞նչ բան ա, ժողովներ ամեն տեղ էլ լինում են, Ձեր հիմնարկում չե՞ն լինում։ 

-  Իմ հարցը ՀՖՖ-ի մասին է, կառույցը բոլորի ուշադրության կենտրոնում է և հետաքրքիր է՝ կրճատումներ սպասվո՞ւմ են, թե՞ ոչ։

-  Իսկ ո՞վ ա ասել, որ կրճատումներ պիտի լինեն։ 

-  Մամուլն է գրում։

-  Մամուլը գրում ա, գնա էդ մամուլին հարցրու։

-  Այսինքն՝ Դուք հերքո՞ւմ եք, որ կրճատումներ են լինելու։

-  Ես չեմ հերքում։ Նորից եմ կրկնում՝ Ձեր հարցերին պատասխանելու իրավունք չունեմ։ Ուղղակի ուզում եմ հասկանալ՝ ի՞նչ արտառոց բան եք գտել։

-  Եթե ՀՖՖ աշխատակազմը կրճատվում է, փոփոխություններ են տեղի ունենում, բնականաբար հետաքրքիր է մեզ այդ ամենը։

-  Շատ ուշացել եք․ երեսուն տարի ա՝ ՀՖՖ-ում կազմի փոփոխություն ա տեղի ունենում։

-  Հիմա՞ էլ։

-  Իհարկե։

-  Կրճատումնե՞ր էլ։

-  Ես չասացի նման բան։ Ֆեդերացիան բնականոն հունով աշխատում է։ Այդտեղ արտառոց բան կա՞։

-  Եթե չկա, ապա կարող եք ասել, որ չկա, ես Ձեր կարծիքը լսելու համար եմ զանգել։

-  Ես չեմ հասկանում՝ ինչն է արտառոց։

-  Օրինակ այն, որ վատ արդյունքների մեղքը աշխատակազմի վրա է բարդվում։

-  Շատ կներեք, Ձեր կարծիքով՝ աշխատակա՞զմն ա դաշտում խաղում։

-  Ես Ձեր կարծիքն եմ հարցնում, մամուլն է գրել։

-  Օդից ինչ ասես գրում եք։

-  Դե պատասխանեք, որ օդից չլինի։

-  Ինձ ինչո՞ւ եք հարցնում, եթե ով ինչ ուզում գրում ա։

-  Դուք հիմա հնարավորություն ունեք արտահայտելու Ձեր տեսակետը։

-  Դուք լուրջ տե՞նց եք մտածում, որ հավաքականի վատ խաղալու մեղավորն աշխատակազղմն ա։

-  Ոչ։

-  Որ այդպես է, շատ ապրեք։

Նարե Գնունի