Ղազախստանի հակակոռուպցիոն ծառայությունը հրապարակել է Ղազախստանի առաջին նախագահ Նուրսուլթան Նազարբաեւի զարմիկի՝ Կայրաթ Սաթիբալդիուլիի դեմ հարուցված քրեական գործի հետաքննության որոշ մանրամասներ, հայտնում է Tengrinews.kz-ն։
«Հակակոռուպցիոն ծառայությունն ավարտել է Կայրաթ Սաթիբալդյուլիի եւ այլ անձանց նկատմամբ նախաքննությունը՝ «Ղազախտելեկոմ» ԲԲԸ-ի եւ «Տրանսպորտային սպասարկման կենտրոն» ՓԲԸ-ի միջոցները առանձնապես խոշոր չափերով հափշտակելու փաստերով։ Գործով անցնում են հինգ կասկածյալներ, որոնցից մեկը կալանավորված է, երկուսը տնային կալանքի տակ են»,- ասվում է հաղորդագրության մեջ։
Գերատեսչության տվյալներով՝ հետաքննության ընթացքում պետությանն են վերադարձվել մեղադրյալների անօրինական ճանապարհով ձեռք բերված ավելի քան 240 միլիարդ տենգե կամ ավելի քան 500 միլիոն դոլար ընդհանուր գումար։
«Սաթիբալդյուլիի հետ կապված քրեական գործերը լրացուցիչ հետաքննվում են հարկերից եւ մաքսային վճարներից խուսափելու, հանցավոր եկամուտների օրինականացման փաստերով։ Ակտիվորեն շարունակվում են մեղադրյալների այլ ապօրինի ակտիվների որոնումները։
Երկրում եւ արտերկրում լրացուցիչ հայտնաբերվել են եւ շուտով պետությանը կվերադարձվեն անշարժ գույք, մեքենաներ եւ դրամական միջոցներ, որոնց ընդհանուր գումարը կազմում է ավելի քան 400 միլիարդ տենգե կամ ավելի քան 900 միլիոն դոլար»,- հավելել են հակակոռուպցիոն ծառայությունում։