Հարցաքննությունն ինտերվյու չէ, որ պատրաստ լինեմ, կամ՝ չէ, եթե նախաքննական մարմինն անհրաժեշտ համարի ինձ հարցաքննելը, ապա կհարցաքննվեմ։ Այդ մասին այսօր կառավարության նիստից հետո լրագրողների հետ զրույցում ասաց առողջապահության նախարար Անահիտ Ավանեսյանը։
Հարցին, թե արդյոք ինքը չէ՞ր հասկացել, որ իրեն նախորդած առողջապահության նախարարի պաշտոնավարման ժամանակ, մասնավորապես, կորոնավիրուսի տարածման ժամանակ եղել են չարաշահումներ, Անահիտ Ավանեսյանը պատասխանեց՝ պետք է պահել անմեղության կանխավարկածը։
«Երբ լինի դատական ակտ, կխոսենք։ Այս պահին նախաքննություն է ընթանում»,- ասաց նա։
Դիտարկմանը, որ Գևորգ Սիմոնյանն էլ իր պաշտոնավարման ժամանակ է նաև աշխատել, իր դեպքում է՞լ չի նկատել որևէ բան, նախարարն արձագանքեց՝ ընթանում է նախաքննություն։
Հարցին, որ հաշվեքննիչ պալատի նախագահն իր զեկույցում նշել էր, որ նման բան եղել է, Անահիտ Ավանեսյանը պատասխանեց՝ հաշվեքննիչ պալատի զեկույցի հիման վրա պետք է այլ քայլեր արվեն, ու հիմա պրոցեսը նորմալ հունով գնում է։
«Ես կարծում եմ, որ պարոն Սիմոնյանի պաշտպաններն իր պաշտպանությամբ զբաղվում են, այսքանով բավարարվում եմ»,- նշեց Ավանեսյանը՝ անդրադառնալով հանգամանքին, որ Արսեն Թորոսյանը հանրայնորեն պաշտպանում է Գևորգ Սիմոնյանին։
Նախարար Ավանեսյանն ասաց, որ ամենևին չի մտահոգվում, որ քրեական գործը կարող է հասնել իրեն։
Մեկ այլ հարցի, թե հնարավո՞ր էր այնպես անել, որ կորոնավիրուսից 8800 մարդ չմահանար, Ավանեսյանը պատասխանեց՝ դրա պատասխանը կարելի է ընդհանուր պատկերի մեջ տեսնել։
«Եթե համենատենք Հայաստանի ունեցած մասշտաբները, կարող ենք տեսնել՝ այն բավականին մեղմ կերպով է անցել։ Այսինքն՝ պայքարը բավարար է եղել»,- նշեց նա։
Մանրամասները՝ տեսանյութում։