Ի հեճուկս Հաագայի դատարանի որոշման՝ Ադրբեջանը շարունակում է ապօրինաբար փակ պահել Լեռնային Ղարաբաղը Հայաստանին կապող Լաչինի միջանցքի միակ ասֆալտապատ ճանապարհը, որի հետեւանքով ԼՂ-ում հումանիտար իրավիճակը շարունակում է լարված մնալ։ Այս մասին Կառավարության այսօրվա նիստի մեկնարկին հայտարարեց Նիկոլ Փաշինյանը:
«Միաժամանակ տեսնում ենք Լեռնային Ղարաբաղի հետ շփման գծում իրադրությունը ռազմական առումով սրելուն ուղղված կոնկրետ գործողություններ Ադրբեջանի կողմից։ Սրա վերջին աղաղակող դրսեւորումը Լեռնային Ղարաբաղի ոստիկանության երեք աշխատակիցների սպանությունն էր՝ ադրբեջանական դիվերսիոն խմբի կողմից։ Այս միջադեպը տեղի է ունեցել ՌԴ խաղաղապահ զորախմբի պատասխանատվության գոտում»,-ասաց նա՝ ընդգծելով՝ ՌԴ պաշտպանության նախարարությունը մարտի 6-ին տարածած հաղորդագրության մեջ արձանագրել է, որ միջադեպի նախաձեռնողը ադրբեջանական կողմն է։
Ըստ նրա՝ ՌԴ ՊՆ հաղորդագրության մեջ ասվում է նաեւ, որ Լեռնային Ղարաբաղի եւ Ադրբեջանի ներկայացուցիչների մասնակցությամբ վարույթ է իրականացվում դեպքի մանրամասները պարզելու համար։
«Այս առումով, կարծում եմ, պետք է հատուկ գնահատականի արժանանա այն փաստը, որ ԼՂ ոստիկանների սպանությունները տեղի են ունեցել Լաչինի միջանցքում։ Ինչպես հիշում եք, 2020թ․-ի նոյեմբերի 9-ի եռակողմ հայտրարության համաձայն Լաչինի միջանցքը Ադրբեջանի կողմից 2022թ․-ի դեկտեմբերի 12-ից ի վեր փակված ճանապարհը չէ միայն, այլեւ 5 կիլոմետր լայնությամբ անվտանգության գոտի։ Հետեւաբար, մարտի 5-ի Ադրբեջանի կողմից իրականացված սպանությունները նոյեմբերի 9-ի հայտարարության եռակի խախտում են պարունակում։ Խախտվել է ոչ միայն հրադադարը, ԼՂ շփման գիծը, այլեւ Լաչինի միջանցքի 5 կիլոմետրանոց գոտին»,-մանրամասնեց Փաշինյանը։
Հայաստանի վարչապետի խոսքով՝ տեւական ժամանակ Ադրբեջանի պետական եւ մերձպետական քարոզչությունը Լեռնային Ղարաբաղի նկատմամբ լայնածավալ հարձակման լրատվական ֆոն է ստեղծում եւ լարվածության միտումները տեսանելի են նաեւ գետնի վրա։
«Մեր գնահատականը շարունակում է մնալ նույնը։ Ադրբեջանի ռազմաքաղաքական ղեկավարությունը ԼՂ ժողովրդի նկատմամբ էթնիկ զտումների, ցեղասպանության նախապատրաստություններ է տեսնում։ Մենք հույս ունենք, որ Ռուսաստանի Դաշնությունը կդիմի ՄԱԿ՝ ահազանգելով ԼՂ խաղաղ բնակչության զանգվածային սպասնությունների եւ քաղաքացիական ենթակառուցվածքների ոչնչացման վտանգի մասին եւ սա թույլ չտալու համար Լեռնային Ղարաբաղում եւ Լաչինի միջանցքում լրացուցիչ միջազգային մեխանիզմներ գործարկելու անհրաժեշտության մասին»,-ասաց Փաշինյանը։
Մանրամասն՝ տեսանյութում։