Մարդիկ կան, որոնք մեզ մեղադրում են Ղարաբաղը Ադրբեջանի կազմում ճանաչելու մեջ։ Այդ մասին այսօր խոհրդարանում ասաց Նիկոլ Փաշինյանը։
«Ես ուզում եմ հստակ արձանագրենք, արդյո՞ք ՀՀ որևէ իշխանություն Ղարաբաղը ճանաչել է Ադրբեջանի կազմում, և ո՞ր իշխանությունն է դա արել։ Այո՛, ՀՀ-ն ճանաչել է Ղարաբաղը Ադրբեջանի կազմում, և դա իրականացվել է Վարդան Օսկանյանի հեղինակությամբ։ Երբ Հայաստանը ընդունել է Մադրիդյան սկզբունքները որպես բանակցային հիմք, այդ պահից սկսած ճանաչել է ԼՂ-ն Ադրբեջանի կազմում»,- նշեց նա։
Նիկոլ Փաշինյանը հիշեցրեց, որ ինքն այս մասին մի անգամ էլ է ԱԺ ամբիոնից հայտարարել, սակայն որևէ բովանդակային հակադարձում չի եղել։
«Հիմա պետք չէ հիստերիկ հայտարարություններ անել։ Ավելին, Վարդան Օսկանյանն է Հայաստանին ճանաչել օկուպանտ։ ՀՀ-ն Վարդան Օսկանյանի և Քոչարյանի այս երկու գործողությունները չի կարողացել հաղթահարել։ Այո՛, մինչև այսօր չի կարողացել հաղթահարել։ Մենք հիմա փորձում ենք կառավարել այդ հայտարարության հետևանքները։ Որովհետև այն ժամանակ ոչ թե Վարդան Օսկանյանն ու Ռոբերտ Քոչարյանն են Ղարաբաղը ճանաչել Ադրբեջանի մաս, այլ՝ ՀՀ-ն է ճանաչել Ղարաբաղը Ադրբեջանի մաս։ Թող խրոխտ ելույթներ չունենան»,- նշեց Փաշինյանը։