Արցախը Ադրբեջանի մաս ճանաչելը եղել է 2008 թվականի իշխանության փոխանցման կոմբինացիայի մաս։ Այդ մասին այսօր ԱԺ ամբիոնից հայտարարեց Նիկոլ Փաշինյանը։
«Սերժ Սարգսյանն ու Էդվարդ Նալբանդյանն էլ են ճանաչել Ղարաբաղը Ադրբեջանի մաս»,- նկատեց նա։
Փաշինյանի դիտարկմամբ՝ Քոչարյանը 1998-ին՝ ԼՂ-ն բանակցային գործընթացից դուրս թողնելով է Ղարաբաղը ճանաչել Ադրբեջանի մաս։
«Հիմա արդյո՞ք մենք պայքարել ենք այդ որոշումների դեմ։ Այո՛, մենք պայքարել ենք, դուք տեսել եք դա։ Բայց չենք հաջողել։ Եվ ժամանակն է խոստովանել, որ երևի չենք էլ հաջողելու։ Բայց էդ ո՞ւմ վրա են ինչ ուզում բարդել։ Քոչարյանն ու Օսկանյանը ԼՂ-ն ճանաչել են Ադրբեջանի մաս, և Սերժ Սարգսյանն ու Էդվարդ Նալբանդյանը դա ստացել են ժառանգություն՝ իշխանությունը ստանձնելու նախապայման որպես»,- ասաց Փաշինյանը։
Փաշինյանը վստահեցրեց, որ նախկիններն իրենց կոտրած ձեռքերով են ճանաչել Ադրբեջանի տարածքային ամբողջականությունը։
«Թող չփորձեն մեր վրա որևէ բան բարդել։ Մենք պայքարել ենք դա հետ շրջելու համար։ Ուզում եմ ևս մեկ հանգամանքի մասին խոսել․ իմ հասցեին հնչող ամենամեծ քննադատությունն այն է, որ ես ասել եմ՝ Արցախը Հայաստան է և վերջ։ Եվ այդ քննադատությունները ցույց են տալիս, որ մենք նախորդ բանակցողների կողմից ունեցել ենք այդ ասվածի չեղարկում»,- նշեց նա։
Փաշինյանը կրկնեց՝ իրենց ուղղված բոլոր մեղադրանքների հասցեատերերը նախկիններն են․ Սերժ Սարգսյանն է սեղանին թողել կապիտուլյացիայի թուղթ ու հեռացել։
«Ես հաստատում եմ, որ խաղաղության օրակարգ բերելու պատասխանատվություն եմ ստանձնում ես։ Էլի ասում եմ՝ այդ պատասխանատվությունը ստանձնելու եմ, գնալու եմ այդ ճանապարհով։ Նորությունն այն է այստեղ, որ ես տեսնում եմ գնալու ճանապարհ։ Եվ ես պատրաստվում եմ այդ ճանապարհով գնալ։ Մենք՝ ժողովուրդն է պատրաստ այդ ճանապարհով գնալ»,- եզրափակեց խոսքը Նիկոլ Փաշինյանը։