Հնդկաստանի կառավարությունը՝ վարչապետ Նարենդրա Մոդիի գլխավորությամբ, դիտարկում է Միացյալ Նահանգների ներմուծման մաքսատուրքերի հետագա կրճատումը, որպեսզի խուսափի «ԱՄՆ-ի հետ առևտրային պատերազմի նման իրավիճակից»: Այս մասին գրել է Reuters գործակալությունը՝ հղում անելով կառավարական աղբյուրներին։

Հնդկաստանը պատրաստվում է լրացուցիչ մաքսային զիջումներ մտցնել Մոդիի՝ փետրվարի 12-13-ը Վաշինգտոն կատարելիք այցից և ԱՄՆ նախագահ Դոնալդ Թրամփի հետ հանդիպումից առաջ։

Սակագների իջեցումը նախատեսված է առնվազն 12 ոլորտներում և կազդի ամերիկյան էլեկտրոնային և բժշկական սարքավորումների, ինչպես նաև նավթաքիմիական որոշ ապրանքների արտահանման վրա։  «Նյու Դելին այսպիսով ձգտում է խթանել ամերիկյան արտահանման աճը դեպի Հնդկաստան, որպեսզի խուսափի Վաշինգտոնի հետ պոտենցիալ առևտրային պատերազմից, որը ԱՄՆ-ն արդեն վարում է Չինաստանի հետ»,- ասել է Հնդկաստանի կառավարական շրջանակների աղբյուրներից մեկը։

Մեկ այլ աղբյուր «The Times of India»-ին ասել է, որ Մոդիի և Թրամփի առաջիկա հանդիպումը հիմնականում կկենտրոնանա 2 երկրների միջև պաշտպանական ու տեխնոլոգիական համագործակցության վրա, իսկ սակագների վերաբերյալ հնարավոր մանրամասն բանակցությունները՝ ավելի ուշ:

Միացյալ Նահանգները Հնդկաստանի առանցքային առևտրային գործընկերն է։ 2023-24 ֆինանսական տարում երկրների միջեւ առեւտուրը կազմել է 118 միլիարդ դոլար:

Տուրքերի կրճատումը, մասնավորապես, անդրադարձել է ամերիկյան «Harley Davidson» ընկերության արտադրած մոտոցիկլետների վրա, որոնց մասին Թրամփը մշտապես պնդել է իր առաջին նախագահական ժամկետում։