Ռուսաստանի, Իրանի եւ Թուրքիայի նախագահները Թեհրանում «Աստանայի ձեւաչափով» հանդիպմանը կքննարկեն Սիրիայի հյուսիսում քրդական կազմավորումների դեմ նոր գործողություն իրականացնելու Անկարայի ծրագրերը, ճեպազրույցի ժամանակ ասել է ՌԴ նախագահի օգնական Յուրի Ուշակովը, փոխանցում է «Ինտերֆաքսը»։
Նրա խոսքով՝ Մոսկվան դեմ է ցանկացած գործողության, որը խախտում է սիրիական կարգավորման հիմնարար սկզբունքները՝ ամրագրված ՄԱԿ-ի Անվտանգության խորհրդի բանաձեւերում եւ Աստանայի ձեւաչափի որոշումներում։ Ուշակովը հավելել է, որ խոսքը Սիրիայի ինքնիշխանությունը, միասնությունն ու տարածքային ամբողջականությունը հարգելու մասին է։
Վլադիմիր Պուտինը հուլիսի 19-ին կմեկնի Թեհրան, որտեղ կհանդիպի Իրանի եւ Թուրքիայի առաջնորդներ Էբրահիմ Ռայիսիի եւ Ռեջեփ Թայիփ Էրդողանի հետ՝ սիրիական կարգավորման շուրջ Աստանայի գործընթացի երաշխավոր երկրների ղեկավարների հանդիպման շրջանակներում: Նա նաեւ երկկողմ հանդիպումներ կունենա այս նախագահների հետ եւ հանդիպում Իրանի գերագույն կառավարիչ Ալի Խամենեիի հետ։