Իրանի միջուկային օբյեկտները լրջորեն վնասվել են ԱՄՆ հարվածներից, հայտարարել է Իրանի արտաքին գործերի նախարար Աբբաս Արաղչին։
«Ոչ ոք ճշգրիտ չգիտի, թե ինչ է տեղի ունեցել Ֆորդոյում: Այս պահին մենք գիտենք, որ օբյեկտները լրջորեն և ծանր վնասվել են: Իրանի Ատոմային էներգիայի կազմակերպությունն այժմ գնահատում և վերլուծություն է անցկացնում, և զեկույցը կներկայացվի կառավարությանը»,- «CBS News»-ին տված հարցազրույցում ասել է Աբբաս Արաղչին։
Դիվանագետի խոսքով՝ «վնասի չափերի վերաբերյալ դեռևս ճշգրիտ տեղեկատվություն չկա»։
«Մենք պետք է սպասենք գնահատականներին, թե հնարավո՞ր է վերագործարկել [միջուկային օբյեկտները], և արդյոք դրանք կվերագործարկվեն, թե՞ ոչ», - ասել է նա:
Արաղչին նաև ասել է, որ գերագույն առաջնորդ Այաթոլլահ Ալի Խամենեի ֆեթվայի համաձայն՝ միջուկային զենքը տեղ չունի Իրանի Իսլամական Հանրապետության պաշտպանական դոկտրինում, և որ այն արգելված է կրոնական տեսանկյունից։