Այս պահին քննչական գործողությունները Շիրակի թեմի առաջնորդարանում շարունակվում են, փակ է մուտքը, ես չեմ կարողանում ներս մտնել, անգամ Միքայել Սրբազանի փաստաբանին չեն թողնում ներս: Այս մասին MediaHub-ին Գյումրիից փոխանցեց ԱԺ «Հայաստան» խմբակցության պատգամավոր Մհեր Մելքոնյանը, ով առավոտից առաջնորդարանի մոտ է:
Նա տեղեկացրեց, որ բազմաթիվ մարդիկ են հավաքվել առաջնորդարանի մոտ, ու դեռ շարունակում են գալ, լարված վիճակ է, բոլորը սպասում են, թե իրավապահաների գործողությունները մինչև ուր կհասնեն:
«Լարվածություն կա, զայրացած է ժողովուրդը, հավաքվում են կամաց-կամաց: Եթե Միքայել Սրբազանին տանեն, ով այս պահին Մայր Աթոռում է, որովհետև մենք լուրեր ստացանք, որ ԱԱԾ-ն արդեն այնտեղ է, ապա դա շատ վատ արձագանք կստանա հավատավոր մարդկանց մոտ: Սրբազանը մեծ հեղինակություն է վայելում, նրան շատ են սիրում ու մարդիկ, լարվածությունն անկասկած կավելանա»,- ասաց նա:
Պատգամավորը նշեց, որ ոստիկաններն այս պահին արդեն մեկ քաղաքացու բերման են ենթարկել և նրանց տրամադրվածությունն այնպիսինն է, որ ցանկացած գործողության արձագանքեն իրենց տրամաբանության մեջ՝ բռնությամբ բերման ենթարկեն ու խոչընդոտեն ժողովրդի կամարտահայտությանը:
Ավելի վաղ MediaHub-ը տեղեկացրել էր, որ ԱԱԾ-ն արդեն Մայր Աթոռի տարածքում է, որտեղ ընթանում է Քահանայից ժողովը: Դրան մասնակցում է նաև Շիրակի թեմի առաջնորդ Միքայել արքեպիսկոպոս Աջապահյանը:
Շարունակում ենք հետևել զարգացումներին: