Fastshift վճարային տերմինալները, որ վերջին տարիներին են հայտնվել մեր իրականությունում, իսկական գլխացավանք են դարձել դրանցից օգտվողների համար։ Անվանումը հուշում է, որ այս տերմինալների միջոցով պետք է փոխանցումները արագ կատարվեն, գուցե՝ ավելի արագ, քան մյուս տերմինալներն են անում։ Բայց արի ու տես, որ ճիշտ հակառակն է՝ այս «արագ փոխանցող» տերմինալներով գումարի փոխանցումները ժամեր են տևում։ Իսկ ընկերությունը որևէ կերպ չի ցանկանում օգնած լինել կամ պատասխանատվություն ստանձնել իրենց «նորարարական» տերմինալների համար։ 

Պլպլան գովազդներ են փակցրել, գեղեցիկ ձևավորել են, որ իբր հաճախորդ գրավեն, բայց իրենց սպասարկմամբ հաճախորդներին վանում են ու հարուցում քաղաքացիների դժգոհությունը։ MediaHub-ին այս մասով քանիցս ահազանգել են, որ «Վիվառո» ընկերության ստեղծած այս տերմինալներից օգտվելն իսկական փորձանք է մարդկանց համար, քանզի փոխանցումն անում ես, կտրոնը տալիս է, որ ամեն ինչ կարգին է, բայց փոխանցումը փաստացի չի կատարվել։ Զանգահարում ես իրենց սպասարկման կենտրոն, ԺԷԿ-ի պետի նման՝ ինչ հարց ասես՝ տալիս են, ինչ տվյալ ասես՝ ուզում են, վերջում ասում են՝ հայտ ենք ներկայացրել, որ դիտարկեն։ Ասում ես՝ ի՞նչ հայտ, փոխանցումը պետք է շտապ կատարվի, ընդամենը պետք է այնպես անել, որ գումարը արագ հասնի հասցեատիրոջը, ասում են՝ «լավ, ուրեմն հայտի վրա կնշենք «շտապ», որ Ձեր հայտը արտահերթ դիտարկեն»։ Ու այսպիսի անհեթեթ պատասխաններով «ցրում են» իրենց տերմինալից օգտվելու դժբախտություն ունեցած հաճախորդին՝ վաստակելով մի քանի հարկանի փաշինյանական բառամթերքով «օրհնանքներ» այս տերմինալը ստեղծողների ու այն մեզ հրամցնողների հասցեին։ 

Ի դեպ, Fastshift-ը «Վիվառո» ընկերության ստեղծած պրոդուկտն է, իսկ «Վիվառոյի» տերերն էլ՝ Վահեն ու Վիգենը, ԱԺ անփառունակ նախագահ Ալեն Սիմոնյանի ընկերներն են։ Թերևս այսքանով ամեն ինչ ասված է։

Վահե Մակարյան