Պետեկամուտների կոմիտեն արդեն մեկ ամսից ավելի է՝ Ներքին անվտանգության վարչության իրական, ոչ ստվերային պետ ունի։

Հունիսի 2-ին ՊԵԿ նախագահի ընկեր, նախկինում քննիչ ու դատախազ աշխատած Գառնիկ Մարգարյանը վերջապես, քննությունները հանձնելուց և որոշ ընթացակարգեր անցնելուց հետո նշանակվեց ՊԵԿ Ներքին անվտանգության վարչության պետ։

Մինչ այդ Մարգարյանը, որ ձևական նշանակվել էր ՆԱՎ-ում խորհրդական, տակից՝ ստվերային կերպով էր կառավարում ՊԵԿ-ի ՆԱՎ-ը, մինչև որ նրա համար կարողացան ապահովել օրինական ընթացակարգեր, որ օրենքի տառին համաձայն նշանակեն ՆԱՎ-ի պետ։ 

MediaHub-ը Գառնիկ Մարգարյանի մասին քանիցս գրել է, որ ՊԵԿ նախագահ Էդուարդ Հակոբյանը իր ընկերոջը, որ մինչ այդ Կենտրոնի դատախազներից էր, իր հետ բերել է ՊԵԿ, որ դառնա իր աչք ու ականջը համակարգում, իր վստահելի մարդը լինի այնտեղ և «ռուլիտ» անի համակարգը։ Մարգարյանն էլ այս ընձեռված արտոնությունից օգտվել և իր բարքերն ու կանոններն էր հաստատել ՊԵԿ-ում՝ հաճախ անտրամաբանական խստացումներ մտցնելով համակարգում, երբեմն ինքնիրավչության ձգտող քայլեր կատարելով, ինչն առաջացրել էր աշխատակիցների դժգոհությունն ու զայրույթը։ Հիմա վերջապես պարոն Մարգարյանն այլևս ստվերային կերպով չի կառավարի ՆԱՎ-ը, այլ բացահայտ՝ ի պաշտոնե։

Ի դեպ, բարձրացած աղմուկից հետո, ասում են, բավականին հանդարտվել է Գառնիկ Մարգարյանը։ 

ՊԵԿ-ում մեկ այլ թափուր պաշտոն էլ է լրացվել նախորդ ամիս․ հունիսի 4-ին Աշոտ Մովսիսյանը նշանակվել է ՊԵԿ հետաքննության և օպերատիվ հետախուզության վարչության պետ։ Ի տարբերություն Գառնիկ Մարգարյանի՝ Աշոտ Մովսիսյանը ՊԵկ համակարգում «աճած» և աստիճանակարգությամբ բարձրացած մարդ է։ Նա մինչ այդ եղել է այդ նույն վարչությունում բաժնի պետ, օպերլիազոր, տեսուչ, հիմա էլ վարչության պետն է։ 

Վահե Մակարյան