Հունիսի 16-ից ծաղկի արտահանման շուկայում իրական քաոս է ստեղծվել։ Շատ արտահանողներ արդեն երկու ամսից ավելի է չեն կարողանում արտահանում իրականացնել, ինչի հետևանքով էլ մինչ այսօր շարունակում են վնասներ կրել։
MediaHub-ի հետ զրույցում տնտեսվարողը նշեց, որ չնայած այսքան ամիսների հայտարարությունների, թե ՌԴ հետ քննարկում են, բանակցում և այլն, միևնույն է՝ փոփոխություն չկա։
Նրա խոսքով, ինքն ու իր բազմաթիվ գործընկերներ շարունակում են վնասներ կրել, արդեն մոտ 4 մլն-ի վնաս են կրել։
Մեր զրուցակիցը նշեց, որ հիմա իրենք ստիպված են միայն Հայաստանում իրականացնել վաճառքը, բայց այս դեպքում էլ միևնույն է վնասների չափը չի մեղմվում, քանի որ վերջին դեպքերով պայմանավորված շատ տնտեսվարողներ ապրանքը սպառում են հայաստանյան շուկայում:
«Երկրից դուրս չենք կարողանում հանել, ուզած-չուզած ՀՀ-ում ենք իրականացնում վաճառքը, բայց մեկ ա՝ էլի ֆինանսապես ոտքի չենք կանգնում, էսքան ժամանակ ա մենակ տուժում ենք»,- նշեց MediaHub-ի զրուցակիցը։
Այս քաոսային իրավիճակին զուգահեռ ՀՀ Սննդամթերքի անվտանգության տեսչությունը հայտնում է, որ 2025 թվականի
սեպտեմբերի 1-ից խստացվելու է կարանտինային բուսասանիտարական բեռների տեղափոխման և օրենսդրական պահանջների պահպանման վերահսկողությունը։ Խոսքը այդ թվում նաև ծաղիկների արտահանմանն է վերաբերում:
Քիչ էր այս ամիսների խնդիրները, հիմա էլ նոր վերահսկողություն ու նոր գլխացավանք է վրա հասնում արտահանողներին։
Մեր զրուցակցին հարցրեցինք, թե ի՞նչ են պատրաստվում անել սեպտեմբերի 1-ից սպասվելիք նոր խստացումների ժամանակ, վերջինս իր մտահոգությունը հայտնեց, նշելով՝ դեռ այս ամենը չեն հաղթահարել, էլ չգիտեն՝ ինչ է լինելու և ինչ պետք է անեն։
Հիշեցնենք, որ Ռուսաստանի Դաշնության «Ռոսսելխոզնադզոր» դաշնային ծառայությունը 2025-ի հունիսի 16-ից ժամանակավոր արգելք է սահմանել Հայաստանից Ռուսաստան ծաղիկների ներմուծման վրա, որի արդյունքում տնտեսվարողները չեն կարողանում արտահանել ծաղիկները։
Էմմա Մարտիրոսյան