Քաղցր գազավորված ըմպելիքների, ինչպիսին է «Coca Cola»-ն, չարաշահումը սպառնում է երիկամների քարերի առաջացմամբ, զգուշացրել է բժիշկ Վլադիսլավ Սեպը:
Նա «Գազետա»-ին պատմել է նման ըմպելիքների նկատմամբ չափազանց սիրո անսպասելի ռիսկի մասին:
Քարերի առաջացման հավանականությունը մեծանում է, քանի որ կոլան և այլ գազավորված ըմպելիքները պարունակում են շաքար, օքսալատներ և ֆոսֆորական թթու: «Օրական 500 միլիլիտր քաղցր գազավորված ըմպելիքը 25 տոկոսով մեծացնում է ուրատային քարերի առաջացման ռիսկը», - մանրամասնել է Սեպը:
Բժշկի խոսքով՝ շաքարի ավելցուկը առաջացնում է օրգանիզմի ջրազրկում, օքսալատները քարերի համար շինանյութ են, իսկ ֆոսֆորական թթուն առաջացնում է արյան մեջ կալցիումի մակարդակի բարձրացում և երիկամներում կալցիումի ֆոսֆատների կուտակում: Այս նյութերի օրգանիզմում կուտակման պատճառով ադապտացիոն մեխանիզմները կարող են գերծանրաբեռնվել, ինչը կհանգեցնի առողջական խնդիրների: