ՀՅԴ Հայաստանի գերագույն մարմնի ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը, այսօր հրավիրված մամուլի ասուլիսում խոսելով իմպիչմենտի գործընթացի և դրա շրջանակներում «Պատիվ ունեմ» խմբակցության հետ բանակցությունների մասին, որոշակի գաղտնազերծումներ արեց։

Նա, մասնավորապես, հայտարարեց․ «Ինչ տեղի ունեցավ, որ իմ համար շատ զարմանալի էր։ Մեր խոսակցության ընթացքում իմ ընկեր Հայկ Մամիջանյանը իրենց վեց ստորագրությունը դրեց իրենց էջին»։  Այս մասին ավելի վաղ իր հարցազրույցներից մեկում հայտարարել էր նաև «Հայաստան» խմբակցության մեկ այլ պատգամավոր Ագնեսա Խամոյանը, որը, սակայն, հանդիպմանը մասնակից չի եղել։

Մամիջանյանը, MediaHub-ի հետ զրույցում անդրադառնալով Իշխան Սաղաթելյանի այս հայտարարությանը, կշտամբանքով համեմված թեթև սպառնալիք հնչեցրեց․ «Ես սովորություն չունեմ հանդիպումների ժամանակ տեղի ունեցած խոսակցությունները հանրայնացնել, եթե էլի տարբեր տեղերից, մանավանդ հանդիպմանը չմասնակցած պատգամավորներից խեղաթյուրված ինֆորմացիա լսեմ այդ հանդիպման մասին, նաև այդ իրադարձության պատճառի մասին կխոսեմ»։

-Այսինքն՝ տեղի է ունեցել նման բան, ամեն դեպքում, որ հանդիպումը դեռ չավարտված եք Դուք ձեր վեց ստորագրությունները հրապարակել, ճի՞շտ է։

-Ես ասել եմ ամենը, ինչ ուզել եմ ասել։

-Ինչ-որ պատճառնե՞ր են եղել, որ հանդիպումը դեռ չավարտված՝ որոշել եք այդ թուղթը հրապարակել։

-Քիչ են դեպքերը, երբ ես որևէ բան անում եմ առանց պատճառի։

-Իրենք տեղյակ եղե՞լ են, որ Դուք այդ թուղթը հրապարակում եք։

-Ի՞նչ է նշանակում՝ իրենք տեղյակ եղել են։ Իրենք տեղյակ են, որ ստորագրություններ առկա են, տեղյակ են, որ այդ գործընթացի տակ կա վեց ստորագրություն։ Չգիտեմ՝ ես ո՞ւմ ինչ-որ բան պիտի տեղեկացնեի։

-Ես իրենց (Իշխան Սաղաթելյանի և Ագնեսա Խամոյանի) խոսքից հասկացա այն, որ իրենք մեղադրում են, որ կոռեկտ չէր կամ էթիկապես ճիշտ չէր բանակցությունների ընթացքում, դեռ հանդիպումը չավարտված, ինչ-որ բան հրապարակելը։

-Այս գործընթացում և, առհասարակ, իմ գործունեության ընթացքում ես աշխատում եմ էնպես ինձ պահել, որ ինձ մեղադրելու տեղ չթողնեմ, ու սա հենց այդ դեպքն է։

-Բայց մեղադրել են, փաստացի։

-Ինձ ոչ ոք չի մեղադրել, չի էլ կարա։

-Իսկ խոսք եղե՞լ է փողոցային պայքարի հետ կապված, որովհետև Սաղաթելյանն ասաց, որ ինքը ձեզ ուղիղ հարցրել է՝ փողոցային պայքար լինելո՞ւ է և ե՞րբ է լինելու, և ձեզնից հստակ պատասխան չի ստացել։ 

-Հանդիպման ժամանակ ներկայացվել են մեր ընկալումները և մոտեցումները գալիք փողոցային պայքարի մասին։ Եթե դրա հետ կապված այլ հարցեր կան, ապա «Հայաստան» դաշինքի մեր գործընկերներից երևի բոլորը իմ հեռախոսահամարը ունեն։

-Հիմա Դուք հստակ ասե՞լ եք, թե երբ է լինելու փողոցային պայքար։

-Մենք ներկայացրել ենք մոտեցումները և օգտագործվելիք գործիքները։

-Ասուլիսի ընթացքում Իշխան Սաղաթելյանը խոսեց նաև այն մասին, որ ինքը ձեզ ասել է՝ իրենց 28 ստորագրությունը համարեք՝ կա, Դուք գնացեք, այն չորս անկախ պատգամավորների կամ ՔՊ-ականների հետ բանակցեք։

-Նախ «Պատիվ ունեմ» խմբակցությանը ոչ ոք չի կարող ասել՝ մենք ինչ, ոնց և երբ իրականացնենք, մենք լավ պատկերացնում ենք, թե էս գործընթացը ինչ հերթականությամբ իրականացնենք։ Սա՝ մեկ։ Երկրորդ, ինչ վերաբերում է՝ համարեք, որ կա, դե, էդ տրամաբաանությամբ, բոլոր 107 պատգամավորները կարող են ասել՝ համարեք, որ կա։ Ստորագրությունները իմպիչմենտի գործընթացի տակ կլինեն այն ժամանակ, երբ դրանք դրված կլինեն մեր ձևաթղթի տակ։

-Բայց այդ 107 պատգամավորներից մյուսները չեն ասել, որ իրենք պատրաստ են ստորագրել, իսկ «Հայաստան» խմբակցությունից ասել են, որ պատրաստ են ստորագրությունները տալ։

-Նորից եմ ասում՝ պատրաստ են ստորագրել և ստորագրություն, դրանք երկու շատ տարբեր մեծություններ են։

-Իսկ մյուս պատգամավորների հետ աշխատանք տարվո՞ւմ է, օրինակ՝ ձեր խմբակցությունից հեռացած Իշխան Զաքարյանի, «Հայաստան» խմբակցությունից դուրս եկած Գեղամ Նազարյանի ու մյուսների։

-Տարվել, տարվում և տարվելու է ամենատարբեր ձևաչափի աշխատանք ամենատարբեր պատգամավորների հետ։

-Որևէ արդյունք կա՞ «Հայաստան» խմբակցությունից դուրս այլ պատգամավորների մասով։

-Այն արդյունքները, որոնք մենք համարենք, որ անհրաժեշտ է հրապարակել, մենք կհրապարակենք։

-Կարո՞ղ ենք ասել, որ այս պահին դեռ արդյունք չկա։

-Չեք կարող, իհարկե, չեք կարող։ Եթե էդպես լիներ, կպատասխանեի էդպես։

-Իսկ ձեր խմբակցությունից դուրս եկած պատգամավոր Իշխան Զաքարյանի հետ այս օրերին փորձե՞լ եք կապ հաստատել, նրան բերել իմպիչմենտի դաշտ։

-Ինձ թվում է՝ նախորդ հարցին պատասխանելիս ես ասացի, որ տարվել, տարվում և տարվելու են աշխատանքներ ամենատարբեր պատգամավորների հետ։

-Պարզապես հանրությունը, կարծում եմ, ունի իրավունք՝ իմանալու, թե ուրիշ ո՞ր պատգամավորի հետ է տարվել կամ տարվում աշխատանք այս հարցում, բացի «Հայաստան» խմբակցության պատգամավորներից, քանզի խնդրահարույցը նրանք են ավելի շատ, ոչ թե «Հայաստան» խմբակցության անդամները։

-Նախ եկեք մի բան ֆիքսենք․ ես համարում էի, որ իմպիչմենտի գործընթացի հաջողության համար փուլ առ փուլ եկող ստորագրություններից «Հայաստան» խմբակցության պատգամավորների կողմից ստորագրելը լինելու է ամենահեշտը, իսկ ՔՊ-ինը կամ որոշ անկախ պատգամավորներինը լինելու է բարդ։ Բայց, արի ու տես, որ «Հայաստան» խմբակցության ստորագրություններ ստանալն էլ է բավականին բարդ դարձել։ Սա՝ առաջինը։ Երկրորդը, հանրությունն, իհարկե, իրավունք ունի և հանրությունը տեղեկացված է լինելու գործընթացի ամեն քայլից, բայց այն տրամաբանությամբ, որ դա շատ չվնասի մեր արդյունքին։ Վստահ եմ, որ և՛ Ձեզ, և՛ հանրությանը առաջին հերթին հետաքրքրում է արդյունքը, այսինքն՝ Փաշինյանի հեռացումը։

-Վերջին հարցը․ Իշխան Սաղաթելյանը Ձեր ընկե՞րն է։

-Այո։

Վահե Մակարյան