Ամռան ամենատարածված ու սիրված սննդամթերքի տեսակներից մեկը ձմերուկն է, որը հիանալի միջոց է շոգ եղանակին զովանալու և քաղցը հագեցնելու համար։ Այս մթերքը հարուստ է մեծ քանակությամբ օգտակար տարրերով և ունի բավական ցածր կալորիականություն, ուստի շատերն այն կիրառում են որպես ավելորդ քաշի դեմ պայքարի արդյունավետ միջոց, սակայն մասնագետները նախազգուշացնում են, որ որոշ դեպքերում անգամ այս օգտակար մթերքը կարող է վտանգավոր լինել, ուստի հարկավոր է շատ ուշադիր լինել։
Բժիշ-ուրոլոգ Նիկոլայ Զախարչենկոն 360tv.ru-ի հետ զրույցում ներկայացրել է ձմերուկի ամենաօգտակար ու վնասակար հատկությունները՝ նշելով, թե որ դեպքերում այն կարող է վտանգավոր լինել։ Մասնագետի խոսքով՝ ձմերուկն օժտված է միզամուղ հատկություններով, ինչի շնորհիվ այն իսկապես որոշ չափով օգնում է մաքրել երիկամները։ Բանն այն է, որ ձմերուկը պարունակում է մեծ քանակությամբ ջուր, ինչի շնորհիվ նպաստում են երիկամներից ավազի ու քարերի դուրսբերմանը։
Ձմերուկի մյուս առավելությունն այն է, որ այն կարող են օգտագործել անգամ շաքարային դիաբետով հիվանդները, սակայն այս դեպքում մթերքը հարկավոր է խիստ սահմանափակ կիրառել։
Այս օգտակար հատկությունների հետ մեկտեղ մասնագետը թվել է նաև ձմերուկի վնասակար հատկությունները, որոնցից մեկը ևս պայմանավորված է դրանում մեծ քանակությամբ ջրի պարունակությամբ։ Մեծ քանակությամբ հեղուկը կարող է վնասակար լինել հաճախ այտուցների խնդրին բախվողների համար՝ էլ ավելի խորացնելով խնդիրը, ուստի նման դեպքերում ձմերուկից խորհուրդ է տրվում խուսափել։
Միևնուն ժամանակ մասնագետը նախազգուշացնում է, որ այտուցներն, ինքնին, պայմանավորված են լինում առողջական որոշակի խնդիրներով, այդ թվում նաև սրտային անբավարարությամբ կամ երիկամների հիվանդություններով, ուստի դրանց առկայության դեպքում առաջին հերթին հարկավոր է դիմել բժշկին ու բուժզննում անցնել։
Նպաստում է քաշի նվազմանը: Ձմերուկը քիչ քանակով ճարպեր և կալորիաներ է պարունակում, նպաստում է օրգանիզմի դետոքսիկացիային:
Օգնում է նվազեցնել բորբոքումը: Առողջության հետ կապված մի շարք խնդիրներ բորբոքման հետևանք են, և բորբոքումից ժամանակին ազատվելը շատ կարևոր է հետագա բարդությունների կանխարգելման համար: Ձմերուկը հակաօքսիդանտներ է պարունակում, որոնք օգնում են նվազեցնել բորբոքումը:
Լավացնում է սրտի աշխատանքը: Ձմերուկն ամինաթթուներ է պարունակում, որոնք նպաստում են սրտի աշխատանքին: Ձմերուկի օգտագործումը օգնում է լավացնել նաև արյան շրջանառությունը, կարգավորել արյան ճնշումը:
Օգնում է պահպանել աչքերի առողջությունը: A, C վիտամինները կարևոր են աչքերի առողջության համար:
Դանդաղեցնում է ծերացումը: Ձմերուկը նպաստում է կոլագենի արտադրմանը, պայքարում է ազատ ռադիկալների դեմ, ինչի շնորհիվ օգնում է խուսափել կնճիռների վաղաժամ առաջացումից, մաշկային խնդիրներից:
Միզամուղ հատկություն ունի: Ձմերուկը կալիում է պարունակում, միզամուղ հատկություն ունի, նպաստում է օրգանիզմի դետոքսիկացիային: