Դեմոկրատական կուսակցության ներկայացուցիչ, ԱՄՆ Ներկայացուցիչների պալատի անդամ Թիմ Ռայանը լրագրողների հետ հացազրույցում կարծիք է հայտնել, որ ԱՄՆ նախագահ Ջո Բայդենը պետք է հրաժարվի 2024թ. ընտրություններին մասնակցելուց՝ հօգուտ առաջնորդների նոր սերնդի, տեղեկացրել է Reuters-ը։

Քանի որ մինչ նոյեմբերին կայանալիք միջանկյալ ընտրությունները երկու ամսից էլ քիչ ժամանակ է մնացել, ուրբաթ Բայդենն այցելել է Օհայո, որի բնակիչները հիմնականում հանրապետականներ են, կիսահաղորդիչների գործարանի կառուցման առաջին քարը դնելու, որը նա գովազդում էր որպես ապացույց այն բանի, որ իր տնտեսական քաղաքականությունն աշխատում է։

Բայց Ռայանն այդ կարծիքի չէ։

Չափավոր դեմոկրատ Ռայանն առաջադրվել է ԱՄՆ սենատում որպես Դոնալդ Թրամփի աջակցությունը վայելող հանրապետական Ջեյ Դի Վենսի մրցակից։ Նրանք պայքարում են այն բանի համար, որպեսզի փոխարինեն հեռացող սենատոր Ռոբ Փորտմանին։

Հինգշաբթի Ռայանը հրապարակային հարց է տվել, թե արդյոք կուսակցությանն էլի ինչ-որ մեկն է անհրաժեշտ՝ Բայդենից բացի, այն բանից հետո, երբ նրան հարցրել են, թե պետք է արդյոք 79-ամյա նախագահը առաջադրվի 2024թ. վերընտրվելու համար։

«Ես կարծում եմ, որ մեզ նոր ղեկավարություն է անհրաժեշտ բոլոր ուղղություններով։ Դեմոկրատներ, հանրապետականներ, ես կարծում եմ, եկել է սերնդափոխության ժամանակը։ Քաղաքական իրադրությունն ամբողջ երկրում թունավոր է, եւ մարդիկ, իմ կարծիքով, փոփոխություններ են ցանկանում»,- ասել է նա։

Ռայանը, որը նախագահի հետ տարակարծություններ ունի մի շարք հարցերում, Բայդենին չի խնդրել իր հետ ընտրարշավ անցկացնել նահանգում, բայց ներկա է եղել Intel-ի հիմնարկեքին նախագահի ելույթի ժամանակ։

Ավելի ուշ թղթակիցները հարցրել էին, թե արդյոք Բայդենը նորից կառաջադրվի, եւ Ռայանն ասել էր, որ դա կախված է նախագահից։

Անցած ամիս Ռայանը դեմոկրատներից առաջինն էր իշխանությունում, որը հրապարակայնորեն խզեց կապերը Բայդենի հետ դաշնային ուսանողական վարկերի գծով պարտքերի թեթեւացման վերաբերյալ նրա հակասական պլանի պատճառով։