Հայ ժողովուրդը և Հայոց պետականությունը կանգնած է գոյութենական ծանրագույն սպառնալիքի առջև. Հայաստանի իշխանությունների որդեգրած ապազգային քաղաքականությունը, Արցախի ժողովրդի ինքնորոշման իրավունքի ուրացումը, ՀՀ Անկախության հռչակագրից բխող հանձնառությունից և Արցախի անվտանգության երաշխավորի սահմանադրական պարտականություններից հրաժարվելը, թուրք-ադրբեջանական պարտադրվող զիջումներն ընդունելու և հայ ժողովրդի ազգային պետական շահերը ստորադասելու քաղաքականությունը կործանարար է։
Այս մասին այսօր հրավիրված ասուլիսի ժամանակ ասաց ՀՅԴ Հայաստանի Գերագույն մարմնի վերընտրված ներկայացուցիչ, «Հայաստան» խմբակցության պատգամավոր Իշխան Սաղաթելյանը` ընթերցելով ՀՅԴ Հայաստանի 26-րդ Գերագույն ժողովի հայտարարությունը։
Հիշեցնենք, որ 2023 թ․ հունիսի 9-11-ը կայացել է ՀՅԴ Հայաստանի 26-րդ Գերագույն ժողովը, որի ավարտին ընտրվել է Գերագույն մարմին՝ հետևյալ անդամներով․ Թադևոս Ավետիսյան, Լիլիթ Գալստյան, Արգիշտի Գևորգյան, Վարդան Հակոբյան, Հակոբ Մաթիլյան, Գեղամ Մանուկյան, Պետրոս Մեղրյան, Իշխան Սաղաթելյան, Իգոր Սարգսյան, Աշոտ Սիմոնյան, Խաչատուր Ստեփանյան, Գերասիմ Վարդանյան, Տարոն Տոնոյան։
«Ադրբեջանի շարունակվող ագրեսիան հանգեցնելու է նոր ցեղասպանության և Արցախի հայաթափման, հարցականի տակ է դնելու Հայաստանի պետականության ապագան։ ՀՅԴ Գերագույն ժողովը համահայկական զորաշարժի կոչ է անում՝ սթափվելու, ընդվզելու, մեր պետությանն ու հայրենիքին համազգային միասնության ճակատով տեր կանգնելու վճռական պահն է»,-ընդգծեց Սաղաթելյանը։
Մանրամասները՝ տեսանյութում