Արցախի կառավարությունը որոշում է կայացրել չսուբսիդավորել ազգաբնակչության էլեկտրաէներգիայի և գազի վճարները: 

Նշենք, որ Արցախի ԱԺ-ում այս հարցին նվիրված այս պահին քննարկումներ են ընթանում և ԱԺ բոլոր պատգամավորները դեմ են կառավարության այդ որոշմանը: 

MediaHub.am-ի հետ զրույցում ԱՀ ԱԺ «Արդարություն» խմբակցության պատգամավոր Մետաքսե Հակոբյանը նշեց՝ թեման այնքան է բարկացրել նրանց, որ ինքը և խմբակցության ղեկավարը դուրս են եկել դահլիճից։

«Խնդիրն այնքան խորքային է․ Կառավարության նախարարներն այնքան իրարից անտեղյակ ու անհաշտ են, որ համապարփակ լուծում միասին չեն կարողանում տալ։ Եկել, հասել են ձմեռ ու ինչ-որ այսպիսի անհասկանալի որոշում են կայացնում։ 30 տարի Արցախում էլեկտրաէներգիայի սուբսիդավորում է եղել, և այսօր, երբ Արցախն ամենաբարդ փուլում է, որոշում են այլևս չսուբսիրդավորել։ Մենք բացատրել ենք, որ այստեղ անվտանգային, սոցիալական, քաղաքական խնդիրներ կան»,-ասաց նա։ 

Մետաքսե Հակոբյանի դիտարկմամբ՝ խոսքը մեծ գումարների մասին չէ, ամսական ողջ բնակչության համար պետք է տրամադրվի 300 մլն դրամ։ «Կառավարությունից ներկայացուցիչներ կան քննարկմանը և տարբեր պատճառաբանություններ են բերում, թե, օրինակ, սուբսիդավորելու փոխարեն, կարող են չգազաֆիկացված համայնքներ գազաֆիկացնել: Աբսուրդ է, էլի, իրենց յուրայինների հետ հարցերը կարգավորելու տարբերակ է, որտեղ էլի տուժում է հասարակ քաղաքացին»,- վրդովված նշեց մեր զրուցակիցը։ 

Հակոբյանը նշեց, որ բնակչության տարբեր խավերի հետ է հանդիպել, հարցը քննարկել և այսօր, ըստ նրա, Արցախում հազվադեպ են հանդիպում ընտանիքներ, որոնք խոցելի չեն։ 

«Այս իրավիճակում Կառավարությունը ոչ մի բարոյական իրավունք չուներ այսպես վարվելու։ Եթե պատերազմից հետո մինչև հիմա ընտանիքների գնահատում չի կատարվել, որոշակի սուբսիդավորման նպատակ էլ չունի, պարզ է դառնում, որ Կառավարությունը պարզապես ցույց է տալիս, թե աշխատում է, բայց ամենը տեղի է ունենում միայն սեփական գրպանի համար։ Ընդդիմությունն այսօր շատ հարցեր ուներ, բայց երբ նկատեցին, որ «տակից չեն կարողանում դուրս գալ», Վլադիմիր Կասյանը պարզապես ինձ ձայնի իրավունքից զրկեց, առանց պատճառ։ Միայն Արցախի իշխող ուժը կարող էր այսպես վարվել, հետո էլ ժողովրդավարությունից խոսել։ Հուսանք՝ գոնե մեր բարձրացրած հիմախնդիրները հաշվի առնելով այդ քայլին չեն գնա»,- ընդգծեց Հակոբյանը։ 

Ի դեպ, պարզվեց, որ էլեկտրաէներգիայի մասով ի վերջո սուբսիդավորում լինելու է, քանի որ խորհրդարանական ուժերը ընդդիմացել էին և չեղարկվել էր որոշումը։

«Երկու տարի ձմռան ամիսների գազի սուբսիավորում է եղել, և այսօր ինչ-որ անհիմն պատճառաբանություններով ուզում էին հրաժարվել այս մոտեցումից։ Մեր առաջարկը գազի սուբսիդավորման մասով պետք է քննարկվեր, սակայն քննարկման ընթացքից հասկացանք, որ իրենք նպատակ չունեն ի շահ ժողովրդի որոշում կայացնել»,- հավելեց Հակոբյանը։

Լիաննա Թորոսյան