Թուրքիայում ընտրական իրավունք ստացած երիտասարդների 57,5 տոկոսը երբեք չի քվեարկի նախագահ Ռաջիփ Թայիփ Էրդողանի օգնտին, եթե նա առաջադրվի 2023 թվականին կայանալիք նախագահական ընտրություններում: Այս մասին հայտնում է Cumhuriyet թերթը`վկայակոչելով Yöneylem Research-ի կողմից իրականացված հարցումը:

Հարցման համաձայն`18-22 տարեկան երիտասարդների միայն 19,3 տոկոսն է ասել, որ կքվեարկի Էրդողանի օգտին, իսկ 51,9 տոկոսը`ընդդիմության անհայտ թեկնածուին:

Երկրի երիտասարդությունը նույնպես նախընտրում է ընդդիմությանը, ասվում է հետազոտության մեջ։ 36,9 տոկոսն ասել է, որ կքվեարկի գլխավոր ընդդիմադիր «Ժողովրդահանրապետական ​​կուսակցության» օգտին, մինչդեռ Էրդողանի իշխող «Արդարություն և զարգացում կուսակցությունը» արժանացել է ռեկորդային ցածր՝ 21,2 տոկոսին:

Խորհրդարանում բալանսն ապահովելու հարցում հարցվածների 43,2 տոկոսը ակնկալում է ընդդիմության դաշինքի հաղթանակը, մինչդեռ իշխող դաշինքի հաղթանակը ցանկանում է 33,4 տոկոսը միայն:

Ավելի քան 54 տոկոսը նախընտրում է Թուրքիայի նախկին խորհրդարանական համակարգը, մինչդեռ 24,8 տոկոսը ընտրում է ներկայիս գործադիր-նախագահական համակարգը, որը ներդրվել է 2017 թվականին անցկացված հանրաքվեի ժամանակ։

Ակնկալվում է, որ Թուրքիայում ընտրությունները կանցկացվեն հաջորդ հունիսին: Երկրի տնտեսության վատթարացումը, COVID-19 համաճարակի հետեւանքները, ներգաղթյալների նկատմամբ կառավարության քաղաքականությունը եւ արտաքին քաղաքականության խնդիրները հանգեցրել են ինչպես իշխող կուսակցության, այնպես էլ անձամբ Էրդողանի նկատմամբ աջակցության զգալի նվազմանը։ Մայիսին Էրդողանի վարկանիշը կազմել է 42 տոկոս, իսկ ընտրողների 60 տոկոսը վստահ չէ, որ նա կարող է լուծել Թուրքիայի տնտեսական խնդիրները: