Մենք տեսնում ենք, որ մինչև հիմա Արցախի կենսական ճանապարհը փակ է, և շարունակում են հումանիտար լրջագույն խնդիրներ առաջանալ։ Այսօր լրագրողների հետ ճեպազրույցում ասաց ԱԺ «Պատիվ ունեմ» խմբակցության պատգամավոր Թագուհի Թովմասյանը։
«Արդեն մանկական կերի խնդիր ունենք, երեխաները կաթ չունեն, տակդիր չունեն, այսինքն՝ այնպիսի առաջնահերթ ապրանքների սղություն կա այս պահին, որ վայրկյան առաջ լուծում է պահանջում»,-ասաց պատգամավորը։
Այնուհետև, Թովմասյանը նշեց, որ մի քանի օր է՝ դիզվառելիքի խնդիր կա, արդեն նաև սննդամթերքի պակասուրդ կա, հումանիտար ճգնաժամը շարունակում է խորանալ Արցախում, միակ լավ նորությունը գազամատակարարման վերականգնումն է, որը ևս հարցի լուծում չէ։
«Ես կարծում եմ, որ մեր գործողությունները՝ որպես Հայաստանի Հանրապետություն, պետք է միտված լինեն նրան, որ կարողանանք կրկնությունը բացառել։ Այսինքն՝ Ադրբեջանի չակերտավոր բնապահպանները հնարավոր է հաջորդիվ փոխարինվեն այլ ակցիա իրականացնողների և պարբերաբար փակեն Արցախի ճանապարհը»,- ընդգծեց Թագուհի Թովմասյանը։
Ըստ պատգամավորի՝ պետք է միասնաբար հասկանալ՝ ինչ անել, որպեսզի արցախահայության իրավունքները վերականգնվեն։
«Արցախի և՛ իշխանությունը, և՛ ընդդիմությունը ունեն միասնական տեսակետ, այն է՝ Արցախը որևէ դեպքում չի զիջվելու»,- խոսքն ամփոփեց պատգամավորը։