Աստված տա, ճանապարհը բնացվի։ Տեսնենք, թե ինչ կլինի, որովհետև աշխատանքներ են տարվում այդ ուղղությամբ և հուսով ենք, որ կբացվի։ Այս մասին այսօր ԱԺ-ում լրագրողների հետ զրույցում ասաց Արցախի ԱԳ նախարարի ժ/պ Դավիթ Բաբայանը՝ խոսելով Լաչինի միջանցքի փակ լինելու մասին։
«Բաներ կան, որ հրապարակային չենք կարող ասել, մեծ աշխատանք է տարվել՝ տարբեր ուղղություններով, կարծում եմ, որ հնարավորություն կա բացվելու։ Ամեն դեպքում պետք է հասկանանք, որ նման ահաբեկչական գործողությունները կարող են շարունակական լինել։ Այդ գործառույթն արդեն կոպիտ խախտում է միջազգային իրավունքի, միջազգային մարդասիրական իրավունք, ինչպես նաև նոյեմբերի 9-ի եռակողմ հայտարարության »,-ասաց նա։
MediaHub.am-ի այն հարցին, թե ռուս խաղաղապահները գործողություններն ինչպե՞ս է վերջինս գնահատում, Բաբայանը պատասխանեց․ «Օբյեկտիվ պետք է լինենք, եթե ռուս խաղաղապահ առաքելությունը չլիներ, Արցախը վաղուց կործանված էր: Մյուս կողմից, մենք տեսնում ենք՝ խաղաղապահ առաքելության ներուժը, որը ուղիղ ածանցյալ է մանդատից, պետք է ավելանա, ուժեղանա և այս տեսակետից մենք ունենք մեր առաջարկները և այդ առաջարկները մենք տարբեր հարթակներից հնչեցրել ենք»,- ընդգծեց նա և հավելեց, որ ռուս խաղաղապահների թիվը պետք է ավելանա, քանի որ 1980 խաղաղապահն ի վիճակի չէ լիարժեք պաշտպանել համապատասխան տարածքները։
Մանրամասները՝ տեսանյութում