Պակիստանի 75-ամյա քաղաքացին, որը Գուանտանամոյի կալանավայրի ամենատարեց կալանավորն է եղել, ազատ է արձակվել եւ շաբաթ օրը վերադարձել Պակիստան, հաղորդում է AP-ն:
Երկրի ԱԳՆ-ը հայտնում է, որ Սայֆուլլա Պարաչան վերամիավորվել է իր ընտանիքի հետ՝ Կուբայում ամերիկյան բազայում ավելի քան 17 տարի կալանքից հետո։
Պարաչան կալանքի տակ է եղել 2003 թվականից՝ «Ալ-Քաիդա»-ի հետ կապերի կասկածանքով, սակայն երբեք չի մեղադրվել հանցագործության մեջ: Անցյալ մայիսին նրան ծանուցել են, որ իր ազատ արձակումը թույլատրվել է: 2020 թվականի նոյեմբերին նա արդարացվել է բանտարկյալների գործերի վերանայման հանձնաժողովի կողմից՝ երկու այլ տղամարդկանց հետ միասին։
Ինչպես միշտ, ծանուցման մեջ չի նշվել որոշման մանրամասն հիմնավորումը, իսկ եզրակացությունը միայն այն է եղել, որ Պարաչան «մշտական սպառնալիք չի ներկայացնում» Միացյալ Նահանգների համար:
Պակիստանի արտաքին գործերի նախարարությունը հայտարարել է, որ ավարտել է Պարաչայի հայրենադարձությունը հեշտացնելու միջգերատեսչական լայնածավալ գործընթացը: «Մենք ուրախ ենք, որ արտերկրում կալանավորված Պակիստանի քաղաքացին վերջապես վերամիավորվել է իր ընտանիքի հետ»,- ասվում է նախարարության հայտարարության մեջ: