Մայիսի 21-ին Արցախի ԱԺ-ն նախագահ ընտրեց, որից հետո՝ 10-օրյա ժամկետում նաև պետք է հանրապետության նախագահ ընտրվեր, սակայն գործընթացը կանգ առավ։
Մեր տեղեկություններով՝ առաջիկա օրերին Արցախի ներկայացուցչությունը հանդես կգա հայտարարությամբ, որտեղ կներկայացվի, թե ով է Արցախի նախագահի թեկնածուն, ապա տեղի կունենա ընտրություն։
«Գործընթաց հիմա էլ կա։ Նախագահի թեկնածու չունենք, բայց առաջիկա օրերին ամեն ինչ կհայտարարենք»,- MediaHub-ի հետ զրույցում ասաց Արցախի «Արդարություն» խմբակցության պատգամավոր Մետաքսե Հակոբյանը։
Նրա խոսքով՝ քանի որ ուշացրել են նախագահի ընտրության հարցը, հիմա իրավական լուծում են փնտրում, որպեսզի հասկանան՝ ինչպես պետք է անցկացվի գործընթացը։
«Հիմա մեր փաստաբաններն ու իրավաբանները լուծումներ են փնտրում, ոնց որ խնդրի լուծման թելի սկիզբը գտել են»,- նշեց Հակոբյանը։
2023-ի հունիսին Արցախում կայացած սահմանադրական փոփոխություններից հետո սեպտեմբերին 9-ին Ազգային ժողովը նախագահ ընտրեց Սամվել Շահրամանյանին՝ մինչև հերթական ընտրությունները։ Նախագահի և Ազգային ժողովի հերթական ընտրությունները պիտի կայանային 2025-ին։ Սահմանադրական այս փոփոխությունը կատարեցին 2023-ի ամռանը և Ազգային ժողովին թույլ էին տալիս ռազմական դրության պայմաններում երկրի նախագահ ընտրել։
2025-ի ապրիլի 15-ին Արցախի Ազգային ժողովը Երևանում նիստ էր գումարել և ընդունել սահմանադրական փոփոխությունների նոր նախագիծ, որի շնորհիվ պիտի պահպանվի նախագահի ինստիտուտը։
2023-ի հոկտեմբերի 3-ին Ադրբեջանի կողմից Դավիթ Իշխանյանի գերեվարումից հետո Արցախի Ազգային ժողովի նախագահի պարտականությունները կատարում էր Գագիկ Բաղունցը։
Նարե Գնունի