Այսօր դեկտեմբերի 7-ն է՝ Սպիտակի ավերիչ երկրաշարժի 34-րդ տարելիցը:
Ավելի քան երեք տասնամյակ է անցել, սակայն Հայաստանում դեռ գոյություն ունի «աղետի գոտի» հասկացություն ու հազարավոր մարդիկ ԴԵՌ չունեն տուն ու ապրուստի արժանավայել պայմաններ: Բայց պետությանը՝ թե՛ երեսուն տարի առաջ, թե՛ 10-20, թե՛ այսօր դա քիչ է մտահոգում:
Ավելին՝ սգո օրը նրանք վերածում են ուրախության:
Հանրային հեռուստաընկերության ֆեյսբուքյան էջից տեղեկանում ենք.
«Երևանի սրտում՝ Հանրապետության հրապարակում, դեկտեմբերի 7-ին, ժամը 17:00-ին կբացվի սահադաշտ և ատրակցիոն, որոնք ձեզ կտեղափոխեն հեքիաթային աշխարհ։
Ատրակցիոնը և սահադաշտը կգործեն ամեն օր` ժամը 13:00-22:00: Տոմսերից ստացված ամբողջ հասույթն ուղղվելու է բարեգործական նպատակների»,- ասված է հաղորդագրության մեջ:
Ասել, որ մեզ զարմացնում է նման հաղորդագրությունը, սխալ կլինի՝ այս իշխանությունների օրոք արժեքների ոտնահարումը սովորական են դարձել:
MediaHub-ի հետ զրույցում Երևանի ավագանու «Բարգավաճ Հայաստան» խմբակցության ղեկավար Միքայել Մանրիկյանը նշեց՝ զարմացած է, որ հենց դեկտեմբերի 7-ն է ընտրվել.
«Ես ուղղակի զրմացած եմ նման որոշում ընդունողների վրա, քանի որ այո, սա հիշատակի, սգո օր է ու թեև աշխատանքային օր է օրացույցով, բայց, այնուամենայնիվ, նման օրով պետական մակարդակի ուրախ միջոցառում կազմակերպելը ինձ համար շատ մտահոգիչ է: Մենք շեղվում ենք մեր արժեքներից. Ո՞ւմ մտքով կարող էր անցնել սգո օրը ուրախալի միջոցառում կազմակերպելը»,- ասաց նա:
Մանրիկյանը նշեց, որ ցավում է, որ մենք հասել ենք սրան, առավել ևս, որ մեկ օր այս կամ այն կողմ նման միջոցառման կազմակերպումը, ասենք՝ դեկտեմբերի 6-ին կամ 8-ին, հաստատ դրանից ոչինչ չէր լինի: Ի վերջո, 34 տարի շարունակ մենք այս օրը հիշել ենք ավերիչ երկրաշարժի զոհերին՝ 25 հազար մարդ է զոհվել, հարյուր հազարավոր մարդիկ հաշմանդամություն են ձեռք բերել, հազարները մնացել անտուն ու մինչև հիմա ոչինչ չի փոխվել նրանց կյանքում:
«Եթե այսպես գնա, ապա մի օր էլ ապրիլի 24-ին նման ուրախ միջոցառումներ կկազմակերպվեն: Սպիտակի երկրաշարժի վերքը սպիացել է, բայց այն չի անցնում»,- հավելեց մեր զրուցակիցը: