Կրեմլը հայտնել է, որ Մոսկվան պատրաստ է ամեն կերպ աջակցել Ադրբեջանի և Հայաստանի ղեկավարների հաջորդ հանդիպմանը Ռուսաստանի տարածքում։
Հարցին, թե հնարավո՞ր է Ադրբեջանի և Հայաստանի ղեկավարների հաջորդ հանդիպումը Ռուսաստանում մինչև տարեվերջ, ՌԴ նախագահի մամուլի քարտուղար Դմիտրի Պեսկովը պատասխանել է.
«Ռուսաստանը, իհարկե, պատրաստ կլինի տրամադրել բոլոր անհրաժեշտ աջակցությունը իր տարածքում նման հանդիպում անցկացնելու համար»։
Կրեմլի ներկայացուցիչը չի բացառել, որ Իլհամ Ալիևի և Նիկոլ Փաշինյանի նման հանդիպում կարող է կայանալ Սանկտ Պետերբուրգում ԱՊՀ երկրների ղեկավարների ամանորյա ավանդական ոչ պաշտոնական հանդիպման շրջանակներում։
«Մտահղացում կա ԱՊՀ գագաթնաժողովի շրջանակում նման նախաամանորյա հանդիպում անցկացնել Սանկտ Պետերբուրգում։ Պայմանավորվածությունների համաժամանակացումից հետո մենք համապատասխան հայտարարություն կանենք։ Եթե փոխըմբռնում լինի՝ կտեղեկացնենք»,- հավելել է Պեսկովը։
MaediaHub-ը հիշեցնում է, որ ԱԺ նախագահ Ալեն Սիմոնյանն այսօր հայտարարել էր, որ չի բացառում, որ մինչև տարեվերջ Փաշինյան-Ալիև հանդիպում տեղի կունենա: