Վենեսուելայի իշխանությունները շաբաթ օրը մեղադրանք են առաջադրել 12 մարդու՝ կապված կառավարության երկարամյա աջակից Կառլոս Լանցի առեւանգման եւ սպանության հետ, հաղորդում է AP լրատվական գործակալությունը եւ հավելում, որ նա ենթադրաբար կանգնած է 1970-ականներին ամերիկացի արդյունաբերողի աղմկահարույց առևանգման հետեւում:
Մեղադրյալների թվում է նաեւ սպանված Կառլոս Լանցի այրին։ Իշխանությունները հայտնել են, որ նա դավադրություն է կազմակերպել իր սիրելիի հետ եւ մարդասպաններին 8000 դոլար վճարել՝ 2020 թվականին կայացած սպանության համար:
Լրատվամիջոցների պնդմամբ՝ Լանցը ղեկավարել է պարտիզանների խումբը, որոնք 1976 թվականին առեւանգել են ով ղեկավարում էր Owens-Illinois Inc-ի վենեսուելական գործունեությունը ղեկավարող Ուիլյամ Նիհաուսին: Նիհաուսը երեք տարի անց ազատվել է, մինչդեռ Լանցը գրեթե տասը տարի անցկացրել է բանտում:
1999 թվականին Ուգո Չավեսի նախագահ դառնալուց հետո, Լանցը նշանակվել է ֆերմերային կոոպերատիվներ ստեղծելու նախաձեռնությունների պատասխանատու: Լանցը հետագայում սկսել է դասավանդել եւ գրել այնպիսի թեմաների շուրջ, ինչպիսիք են ԱՄՆ-ի «ոչ ավանդական պատերազմը», մշակութային ապստամբությունը եւ գյուղատնտեսության զարգացումը:
2020 թվականին 74-ամյա Լանցն անհետացել է Արագուա նահանգում գտնվող իր տան մոտից։ Ավելի ուշ նրա մարմինը հայտնաբերվել է հարեւան նահանգի ռանչոյում՝ երկու փամփուշտի տեղ գլխին: Այս հանցագործությունը ցնցել է Նիկոլաս Մադուրոյի կառավարության շատ անդամների, ովքեր հարգում էին մարքսիստ գիտնականին եւ կարծում, որ նրա սպանությունը կարող էր իրականացվել օտարերկրյա վարձկանների կողմից:
Գլխավոր դատախազ Ուիլյամ Սաաբը հայտարարել է, որ Լանցի սպանության հետաքննությունը դեռ շարունակվում է, եւ կարող են ավելի շատ ձերբակալություններ տեղի ունենալ: