79 տարի առաջ ամուսնացած ԱՄՆ-ից մի զույգ պատմել է, թե ինչպես են իրենք հանդիպել, ու բացահայտել են երջանիկ ամուսնության գաղտնիքը, փոխանցում է Лента պարբերականը։
Ուիլյամ Հյուբերտ Մալիկոթը և նրա կինը՝ Ֆրենսիս Ջուն Նապիերը ծնվել են 1922 թվականի հուլիսին։ 1943 թվականի հունիսի 8-ին նրանք ամուսնացել են Ինդիանա նահանգում, իսկ Երկրորդ համաշխարհային պատերազմից հետո, որի ընթացքում Մալիկոթը ծառայել է ԱՄՆ ռազմածովային նավատորմում, նրանք բնակություն են հաստատել Օհայո նահանգի Համիլթոն քաղաքում, որտեղ ապրում են մինչ օրս։
100-ամյա ամուսիններն ամուր ամուսնության գլխավոր գաղտնիքն անվանել են փոխըմբռնումն ու միմյանց նկատմամբ հարգանքը։ Մալիքոթն ասել է, որ իրենք այսքան տարի միասին են ապրել, քանի որ միշտ ընդհանուր հետաքրքրություններ են գտել, հասկացել են ընտանիքի կարևորությունը և երբեք չեն վիճել։
Տղամարդը պատմել է, որ ապագա ընտրյալին հանդիպել է, երբ ընկերների հետ եկեղեցի է գնացել։
«Հետևի նստարանը հրաշքով դատարկ էր, ուստի մենք ներս մտանք: Մեր դիմացի շարքում աղջիկներ էին նստած։ Ջունը շրջվեց և ժպտաց ինձ», – հիշում է Մալիկոթը:
Նա 50 տարի աշխատել է որպես մեխանիկ Diebold ընկերությունում, իսկ կինը զբաղվել է տնային գործերով և մեծացրել երեք երեխաներին։ Զույգն այժմ ունի 7 թոռ և 11 ծոռ։ Ամբողջ ընտանիքը հուլիսին հավաքվելու է Համիլթոնում՝ նշելու Հյուբերտի և Ջունի 100-ամյակը և նրանց ամուսնության 79-ամյակը: