Նախօրեին գրել էինք, որ Նոր Նորք վարչական շրջանում հակասանիտարական վիճակ է․ MediaHub-ին դիմած բնակիչներն ահազանգում են՝ 105 մանկապարտեզի հարակից տարածքում կոյուղաջրերը գետի նման հոսում են։ 

Նրանք նշում էին, որ երկու օր է նման վիճակ է, սակայն պատկան մարմիններից որևէ մեկի ներկայացուցչին չեն տեսել:
MediaHub-ը դիմել էր «Վեոլիա Ջուր» ընկերությանը՝ հասկանալու, թե ի՞նչ են անում կամ ի՞նչ են պատրաստվում անել՝ վերացնելու այդ հակասանիտարական վիճակը։

Ընկերությունից մեզ պատասխանեցին. «Աշխատանքները տարվում են, ամբողջ հյուսիս տեղամասի բանվորական  ուժն այնտեղ է, որ խնդիրը լուծեն։ Խնդիրն այն է, որ ծառի արմատներն ամբողջությամբ կոյուղագծի, կոյուղատարի մեջ են, և այժմ տեղամասն ամբողջ օրն աշխատել է, որ կարողանա այդ խցանումը բացել՝ ծառի արմատնեըը հեռացնելով, որը բավականին բարդ աշխատանք է»։ 

Խցանումը վերացնելուց հետո, ըստ «Վեոլիա Ջուր» ընկերության, Երևանի քաղաքապետարանի հետ համաձայնություն կա, որ այդտեղ կոյուղագիծը պետք է վերակառուցվի, հետագիծը, ըստ երևույթի, սխալ է կառուցված եղել տարիներ առաջ և նորը պետք է կառուցվի, որ նման խնդիրներ չլինեն: 

Մարիաննա Արամյան