Ուզում եմ շնորհակալություն հայտնել իմ նախկին, ներկա գործընկերներին՝ ոչ բոլորին, ձևական և կեղծավոր բաներ չեմ անելու։ Այս մասին այսօր Երևանի ավագանու նիստի ընթացքում իր ելույթում ասաց «Լույս» խմբակցության ավագանի Թեհմինա Վարդանյանը։
«Որևէ դրվագի համար չեմ փոշմանում, հուսով եմ՝ փոշմանում են «Իմ քայլը» խմբակցության ավագանու անդամները, որ ժամանակին մեզ ականջալուր չեն եղել, որովհետև ընկերներ, դուք երեք տարի հետ ենք ընկել ձեր ծրագրերից, երեք տարի գործադիրը զբաղվել է ամուլ աշխատանքներով: Միանշանակ է, որ 1,5 տարվա ընթացքում արվել է այնչափ աշխատանք, որ 3,5 տարվա ընթացքում չի արվել»,-ասաց նա։
Վարդանյանը նշեց, որ հաճախ է լսում կարծիքներ, թե այլևս չի բողոքում։
«Հարցնում են՝ ինչի՞ չես խոսում, քո պրոբլեմը Մարությանի անձի հե՞տ էր։ Ժողովուրդ ջան, իմ պրոբլեմը ոչ թե Մարությանի հետ էր, այլ քաղաքապետի աթոռին նստած լկտի պահվածք դրևսորող, ամուլ մի մարդու հետ էր, որը սեփական մուտիտներով, ծամածռություններով անում էր փոքրիկ շոուներ ու հունից հանում ինձ ու վստահաբար, իշխանական ավագանու անդամներին»,-ասաց նա։
Վարդանյանը խոսեց նաև նախկին քաղաքապետ Հայկ Մարությանի ներկայացման մասին։
«Նայել եմ ներկայացումը, շատ ողբերգական ներկայացում էր, ասում էր՝ դհոլը ձեռքիցս վերցրին։ Էդ դհոլը պիտի գլխիդ տային, երեք տարի ձեզ զգուշացնում էի, ասում էիք՝ չէ, մեր կարգին Հայկոն ա, մեր կարգին տղեն ա»,-նշեց Վարդանյանը։
Խոսելով նոր տրանսպորտային միջոցների մասին, վերջինս նշեց․
«Իրականում, մարդ ինչքան էլ ընդդիմություն լինի, ես անկեղծ, երբ տեսնում եմ նոր տրոլեյբուսներն ու ավտոբուսները, ուզում եմ իջնեմ, համբուրեմ. չի կարելի էդքան չարակամ լինել։ Ես որևէ մեկիդ չեմ ների, եթե Հայկ Մարությանը վերադառնա այս դահլիճ»։
Մանրամասները՝ տեսանյութում