Ուկրաինայի նախագահ Վլադիմիր Զելենսկին հրաժարվել է ստորագրել համաձայնագիրը, որը ԱՄՆ-ին իրավունք է տալիս օգտագործել Ուկրաինայի հանքային պաշարների 50%-ը, գրել են ԶԼՄ-ները։
Փաստաթուղթն Ամերիկայի Միացյալ Նահանգներին իրավունք կտա Ուկրաինայի ապագա հանքային պաշարների 50%-ի նկատմամբ: Զելենսկին «քաղաքավարի կերպով» հրաժարվել է ստորագրել այն։
Փետրվարի 14-ին Զելենսկին Մյունխենի անվտանգության համաժողովի շրջանակում ասել էր, որ «պատրաստ չէ ամեն ինչ ստորագրել», սակայն պատրաստ է քննարկել Ուկրաինայի և ԱՄՆ-ի միջև հանքային ռեսուրսների վերաբերյալ հնարավոր համաձայնագիրը։
Փետրվարի 3-ին Թրամփը առաջարկել էր Ուկրաինային օգնություն փոխանցել հազվագյուտ հանածողների դիմաց (այս խումբը ներառում է 17 տարր՝ սկանդիում, իտրիում, լանթան և այլն)։ Ավելի ուշ հանրապետականը գործարքի արժեքը գնահատել էր 500 միլիոն դոլար՝ ասելով, որ հազվագյուտ հողային մետաղների և գազի հասանելիության դիմաց Վաշինգտոնը Ուկրաինային անվտանգության երաշխիքներ կտա ցանկացած հնարավոր խաղաղ կարգավորման հարցում: Սպիտակ տունը բացատրել է, որ ԱՄՆ-ը մտադիր է Ուկրաինայից հազվագյուտ հողային մետաղներ ձեռք բերել՝ Կիեւին աջակցելու համար ծախսված միջոցների փոխհատուցման դիմաց։
Զելենսկին նշել է, որ Ուկրաինան մտադիր չէ իր ռեսուրսներն անվճար կիսել ԱՄՆ-ի հետ, սակայն պատրաստ է գործարքի, որը հնարավոր կդարձնի օգտակար հանածոների համատեղ շահագործումը։
ՌԴ նախագահի մամուլի քարտուղար Դմիտրի Պեսկովը հայտնել էր, որ ԱՄՆ-ի առաջարկը վկայում է Ուկրաինային «առևտրային հիմունքներով» օգնություն տրամադրելու մտադրության մասին։ «Ավելի լավ է, իհարկե, ընդհանրապես օգնություն չցուցաբերել և դրանով իսկ նպաստել այս հակամարտության ավարտին»,- հավելել էր նա։