Վերջին օրերին մայրաքաղաքում, հատկապես Կենտրոնում, երթևեկելը դարձել է պատիժ բոլոր վարորդների համար․ ավտոբուսների համար նախատեսված գծերի ավելացումը կիլոմետրերի հասնող խցանումների պատճառ է դարձել։ Ընդ որում՝ նաև հանգստյան օրերին: Սոցցանցերում հարյուրների են հասնում վարորդների գրառումներն ու բողոքները, որ այս կերպ ուղղակի հնարավոր չէ երթևեկել։
MediaHub-ը թեմայի շուրջ զրուցեց Երևանի քաղաքապետի մամուլի խոսնակ Հայկ Կոստանյանի հետ՝ հասկանալու, թե արդյո՞ք հնարավոր է, որ այս «բարեփոխումները», որոնք իրականում ոչինչ էլ չեն բարեփոխել, վերանայվեն, որպեսզի վարորդները կարողանան նորմալ երթևեկել։
«Ես այսօր էլ մեր տրանսպորտի վարչության պետի հետ այդ հարցով քննարկում ունեցել եմ։ Մենք այս փոփոխություններն անում ենք, ավտոբուսի համար գծեր ենք առանձնացնում, որ հանրային տրանսպորտով երթևեկող մարդիկ խցանումների մեջ չհայտնվեն։ Բայց մենք էլ նկատում ենք, որ մյուս վարորդների համար դա ինչ-որ չափով խնդիրներ է առաջացրել»,- մեզ հետ զրույցում ասաց Հայկ Կոստանյանը։
Դիտարկմանը, որ բողոքները հատկապես շատ են քաղաքապետարանի հարակից տարածքի վերաբերյալ՝ թե՛ դեպի Հաղթանակի կամուրջ, թե՛ Կոնյակի գործարանից եկող, որտեղ երեկ էլ, կիրակի օրով, բոլոր ժամերին խցանում է եղել, Կոստանյանը պատասխանեց, որ այո՛, իրենք էլ են տեղյակ այդ խնդրին։
«Հիմա մենք այս շաբաթ մշտադիտարկում ենք անելու, որ հասկանանք՝ ինչպես կարող ենք կազմակերպել երթևեկությունը, որ նման խնդիր չառաջանա։ Ճիշտ է, ցանկացած տեղում, որտեղ ունենք ավտոբուսի առանձնացված գծեր, որոշակիորեն դանդաղել է երթևեկությունը սովորական վարորդների համար, բայց գոնե նման խցանումներ չեն առաջանում։ Հիմա պետք է հասկանանք, թե այս հատվածում ինչ կարող
ենք անել»,- ասաց Հայկ Կոստանյանը։
Նարե Գնունի