Սննդի անվտանգության տեսչական մարմինը «Տաշիր պիցցա» սննդի ցանցի 30 կետից 15-ում ստուգումներ է արել, որից 12-ում խախտումներ հայտնաբերվել են, երեքում՝ ոչ, տասներկուսից մեկի կասեցումն էլ վերացվել է։ Այդ մեկը ընկերության Էրեբունու մասնաճյուղն էր, որն այսօրվանից նորից կգործի։
ՍԱՏՄ-ից MediaHub-ի հետ զրույցում ասացին, որ հիմնականում սանիտարահիգիենիկ խախտումներ են հայտմաբերվել, երկուսում՝ սննդի որակի խնդիր է եղել, սննդի կետերի կողմից ժամկետ է սահմանվել, որ խնդիրները լուծեն։ Իսկ թե ինչո՞ւ ՍԱՏՄ-ն որոշեց հենց այս փուլում ստուգումներ սկսել «Տաշիր պիցցա» ընկերությունում, երբ կալանավորեցին ընկերության սեփականատեր Սամվել Կարապետյանին, ՍԱՏՄ-ից ասացին․ «Մեր ստուգումների ծրագրում իրենք չեն եղել, բողոք ոչ ոք չի ներկայացրել, մենք ստուգումների մտել ենք ընկերության դիմումի հիման վրա, որը այս դեպքերից մոտ երկու շաբաթ առաջ էր եղել»։
ՍԱՏՄ-ն իրավունք չունի առանց բողոքի կամ դիմումի մտնել որևէ ընկերություն՝ ստուգման, եթե այդ ընկերությունն իրենց ստուգումների տարեկան ծրագրում չկա։ Ու հիմա, ըստ ՍԱՏՄ-ի, «Տաշիր պիցցա» ընկերության սննդի կետերում իրենց ստուգումներն ու դրանց արդյունքների հրապարակումը, «ցավալիորեն», համընկել են ընկերության սեփականատիրոջ դեմ սկսված իրավական գործընթացների հետ։ Մյուս 15 ցանցերում ևս ստուգումները շարունակվում են։
Վահե Մակարյան