Երեկվա հանրահավաքը հաջողված հանրահավաք էր, որովհետև արցախցին փաստեց, որ իր իրավունքները ոչ ոքի չի զիջի և տեր է իր իրավունքներին, և այն փաստաթուղթը, որ կստորագրվի առանց իր իմացության, վերջ կդնի Արցախի հայության ճակատագրին։ Այս մասին այսօր MediaHub.am-ի հետ զրույցում ասաց Արցախի Հանրապետության խորհրդարանի ՀՅԴ խմբակցության պատգամավոր Արթուր Մոսիյանը։
Մոսիյանի խոսքով՝ երեկ արցախցիները հստակ կոչով դիմեցին ՀՀ իշխանությանը՝ պահանջելով չստորագրել խաղաղության պայմանագիրը, այդպիսով վտանգելով հայերի ապագան։
«Սահմանազատումը, սահմանագծումը չի կարող վերաբերել Արցախի ինքնորոշման իրավունքին»,- ասաց նա։
Խոսելով այսօր նախատեսված Փաշինյան-Պուտին-Ալիև հանդիպման մասին, պատգամավորն ընդգծեց, որ ամեն հանդիպումից մեծ ակնկալիքներ ունեն, սակայն լինում են դեպքեր, երբ բանակցությունները հակառակ էֆեկտ կամ առհասարակ ոչ մի դրական ազդեցություն չեն ունենում.
«Անկախ բանակցությունների արդյունքից՝ մենք համարում ենք, որ մեր իրավունքների տերը մենք ենք։ Արցախից ներկայացուցիչ կմասնակցի բանակցություններին, եթե վերականգնվի միջազգայնորեն ընդունված ձևաչափը՝ ԵԱՀԿ Մինսկի խմբի և միջազգային դիտորդների առկայությամբ։ Մենք բանակցություններին պետք է մասնակցենք որպես հակամարտող կողմ»,-ընդգծեց նա և հավելեց, որ Ալիևի այն հայտարարությունը, թե արցախցիներն Ադրբեջանի էթնիկ հայ համայնքն են, վտանգավոր է և սա պետք է իր լուծումն անհապաղ ստանա։ Պատգամավորը հավելեց, որ այս և շատ այլ հանգամանքներ հաշվի առնելով՝ հանրահավաքները կարող են շարունակական բնույթ կրել։ «Մենք երեկ փաստեցինք, որ սա սկիզբն է, վերջը չէ»։
Լիաննա Թոսրոսյան