Ես ողջունում եմ Արցախի բոլոր այն միջոցառումները, որտեղ նրանք հստակ ցույց են տալիս իրենց դիրքորոշումը։ Կարծում եմ՝ իր արդյունքը կունենա, բայց դժվար թե սա բավարար միջոց է ինքնորոշման իրավունքը պահելու համար։ Այս մասին MediaHub.am-ի հետ զրույցում ասաց ՀՀ մարդու իրավունքների առաջին պաշտպան, հասարակական գործիչ Լարիսա Ալավերդյանը։
«Իրենց հայտարարության հետ միասին՝ հասցեական պետք է Մինսկի խմբի համանախագահ պետությունների ղեկավարներին, ՄԱԿ-ի բոլոր անդամներին, ԵԱՀԿ-ին, ՀԱՊԿ-ին դիմեն։ Եվ արդեն ժամանակն է, որ դիմեն Ֆրանսիայի նախագահին և հստակեցնեն, վավերացնեն այն որոշումը, որ նա ուներ՝ ճանաչել ԼՂՀ-ն»,-ասաց նա։
Լարիսա Ալավերդյանը հիշեցրեց Փաշինյանի այն հայտարարությունը, թե բոլոր երկրներն էլ համարում են, որ Արցախը Ադրբեջանի մաս է։ Ըստ նրա՝ սա խայտառակ դիրքորոշում է, քանի որ այդ բոլորի մեջ կարող է շատ հեշտորեն նաև Հայաստանը մտնել։
«Սա նշանակում է, որ Հայաստանի իշխանությունը սպառել է խաբեությունների պաշարը և անցել է գրոհի՝ լինի դա արցախահայության դեմ, թե բոլոր հայերի դեմ։ Արցախի ներկայացուցիչները պետք է անպայմանորեն շարունակեն իրենց հայտարարության թեզերը՝ հասցեական ուղարկելով բոլոր միջազգային կառույցներին»,-ընդգծեց նա և հավելեց, որ սա է միակ տարբերակը, որ կարող է հետ պահել նոր ցեղասպանությունից։
Խոսելով նախատեսված Փաշինյան-Պուտին-Ալիև հանդիպման մասին, Ալավերդյանն ընդգծեց, որ այս իշխանության նպատակն այն է, որ Հայաստանը դառնա Թուրքիայի, իսկ Արցախը՝ Ադրբեջանի կցորդ։
«Այսպիսի եռակողմ հանդիպումներից ես դադարել եմ ինչ-որ ակնկալիքներ ունենալ, քանի որ չկա մի բան, որ կներկայացնի բուն Հայաստանի ազգային շահերը։ Հայկական կողմի իրական կարծիքը ոչ ոք չի հասցնում եռակողմ հանդիպումների ընթացքում»,-շեշտեց նա։
Լիաննա Թորոսյան