Առաջարկում ենք հիփոթեքային վարկերի սպասարկման համար, ըստ մարզերի ու տարիների, աստիճանաբար կրճատել եկամտային հարկի վերադարձման համակարգի կիրառության շրջանակը։ Այդ մասին այսօր Կառավարության նիստի ընթացքում ասաց ֆինանսների նախարար Վահե Հովհաննիսյանը։
Նրա խոսքով՝ հիմնական նպատակները երկուսն են՝ մարզերում քաղաքաշինական ու տնտեսական ակտիվությունը խթանող տնտեսվարող սուբյեկտների և քաղաքացիների որոշումների կայացմանը ժամանակի մեջ առաջ բերելն ու խրախուսելը։
«Եվ երկրորդը, եկամտային հարկի վերադարձման համակարգի կիրառության շրջանակի հետագա երկարաժամկետ հեռանկարում ընդլայնումը զսպելը»,- նշեց նախարարը։
Այս առումով, Հովհաննիսյանի խոսքով, առաջարկվում է սահմանել, որ եկամտային հարկը 2027 թվականի հունվարի մեկից հետո ստացված հիփոթեքային վարկի դեպքում չի վերադարձվում, եթե գույքը գտնվում է Արագածոտնի, Արարատի, Արմավիրի և Կոտայքի մարզերում։ 2029 թվականից նախագիծը վերաբերելու է բոլոր մարզերին։
Իսկ սահմանամերձ մարզերին այս ամենը չի վերաբերի։
«2025 թվականին ստացված հիփոթեքային վարկի վարկառուին և առկայության դեպքում համավարկառուներին վերադարձվող եկամտային հարկի ընդհանուր գումարը չի կարող գերազանցել եռամսյակի համար 750 հազար դրամը»,- ներկայացրեց նախարարը։
Մանրամասները՝ տեսանյութում։