Mediahub-ը գրել էր, որ «Քաղաքացիական պայմանագիր» կուսակցության պատգամավոր Դավիթ Կարապետյանը իր հաշվետու տարվա եկամուտների և անշարժ գույքի վերաբերյալ հայտարարագիրը սահմանված ժամկետից ուշ է ներկայացրել, և մնացած տվյալներում առկա են անճշտություններ։
Մասնավորապես, պատգամավորի հայտարարագրում նշվում է, որ նա 2024 թվականի ընթացքում ձեռք է բերել բնակարան, սակայն դրա արժեքը նշված է 29.5 դրամ։
Mediahub-ը այս ամենի առթիվ գրավոր հարցում էր ուղարկել Կոռուպցիայի կանխարգելման հանձնաժողով՝ պարզելու հետևյալը`
- Ստուգվե՞լ է արդյոք «Քաղաքացիական պայմանագիր» կուսակցության պատգամավոր Դավիթ Կարապետյանի ներկայացրած հայտարարագիրը;
- Հայտարարագրի ուշ ներկայացման համար ի՞նչ տույժի է ենթարկվել;
- Ինչպե՞ս է հնարավոր, որ ձեռք բերված բնակարանի արժեքը կազմի 29.5 դրամ։
Հարցմանն ի պատասխան՝ հայտնել էին, որ Mediahub-ի հրապարակման հիման վրա տվյալների ստուգում է իրականացվում։
Մեր երկրորդ հարցին ի պատասխան նշվում է, որ անձը վարչական իրավախախտման համար տույժի չի ենթարկվել, քանի որ հանձնաժողովի զգուշացումից հետո հայտարարագիրը լրացվել է 30 օրվա ընթացքում։
Ինչ վերաբերում է բնակարանի 29.5 դրամ արժեքով ձեռք բերման հարցին, ապա Կոռուպցիայի կանխարգելման հանձնաժողովը ներկայումս իրականացնում է արձանագրված առերևույթ անհամապատասխանությունների ստուգում, որի արդյունքները կներառվեն հանձնաժողովի կողմից հրապարակվող հաշվետվությունում։
Էմմա Մարտիրոսյան