Վաղը Տավուշի մարզի Բերդ համայնքում կկայանա համայնքի ղեկավարի երդման արարողությունը։ Նորընտրիր համայնքապետը «Զորավոր համայնք»  դաշինքի կողմից առաջադրված  թեկնածու Աստղիկ Հակոբյանն է, որ ավագանու անդրանիկ նիստի ընտացքում  ստացել էր 11 ձայն:  

Իսկ սեպտեմբերին Բերդում կայացած ՏԻՄ ընտրությունների արդյումքում  50 տոկոսից ավելի ձայն ստացած «Զորավոր համայնք» դաշինքի ընտրական ցուցակը գլխավորող Հարություն Մանուչարյանը կրկին կալանավորված է, բայց նա ավելի վաղ ինքնաբացարկ էր հայտնել ու հրաժարվել մանդատից:

MediaHub.am-ի Տավուշի աղբյուրների փոխանցմամբ՝ համայնքում խոսակցություններ կան, թե իշխանությունն ամեն ինչ անում է հանուն ՔՊ-ական թեկնածու Վահրամ Սուքիասյանի, քանի որ վերջինս վստահ էր իր հաղթանակում, սակայն Հարություն Մանուչարյանը կալանքի տակ գտնվելով՝ կարողացավ հաղթել ՔՊ-ին։

Սուքիասյանը, սակայն, MediaHub.am-ի հետ զրույցում ասաց, որ այս խոսակցությունները պարզապես «պատերի տակ եղած խոսակցություններ են»։

«Մանուչարյանի կալանավորվելու մեկնաբանությունը իրավապահ մարմինները կտան, ես տեղյակ չեմ։ Համայնքի ղեկավար ընտրվել է արդեն, վերջ, վաղն էլ երդմնակալության արարողությունն է»,- ասաց նա։

Հարցին՝ Հակոբյանն իրեն կարդարացնի՞, Սուքիասյանը պատասխանեց․ «Գնահատում եմ ժողովրդի ընտրությունը, մնացածը՝ կապրենք, կտեսնենք»։ 

Նշենք, որ նոյեմբերի 10-ին Բերդում առաջադրվել էր  համայնքի ղեկավարի երեք թեկնածու,  բաց քվեարկություն է եղել, որի արդյունքում ՔՊ թեկնածուն հավաքել է 8 ձայն։ 

Լիաննա Թորոսյան