Ստամբուլի գլխավոր դատախազությունը հետաքննություն է սկսել սոցիալական ցանցերի օգտատերերի նկատմամբ, որոնք տեսանյութեր են հրապարակել, որտեղ նրանք թաքցնում են իրենց փողերը Թուրքիայի նախագահից, հայտնում է Cumhuriyet թերթը։
Twitter-ի եւ TikTok-ի թուրք օգտատերերը վերջին մի քանի օրվա ընթացքում հրապարակել են հարյուրավոր նման տեսանյութեր, որոնցում նրանք ամեն կերպ փորձում են թաքցնել իրենց գումարները, երբ հայտնվում է Ռեջեփ Թայիփ Էրդողանի պատկերը, որը կոչ է անում նրանց «բարձի տակից հանել ոսկու եւ արտարժույթի խնայողությունները»:
Էրդողանի խոսքերը մի հատված են ելույթից, որում նա քաղաքացիներին կոչ էր անում իրենց խնայողությունները ներդնել բանկերում՝ հիվանդ թուրքական լիրային աջակցելու համար։
Տեսանյութերը հրապարակած օգտատերերը հետաքննության են ենթարկվում «նախագահին վիրավորելու» համար, հայտնում է Cumhuriyet-ը։ Ոստիկանությանը հանձնարարվել է բացահայտել եւ բերման ենթարկել կասկածյալներին։
Թուրքիայի ՔՕ 299-րդ հոդվածի համաձայն՝ «նախագահին վիրավորելը» պատժվում է 1-4 տարի ժամկետով ազատազրկմամբ։ 2014 թվականից ի վեր Էրդողանին վիրավորելու համար տասնյակ հազարավոր մարդիկ են մեղադրվել եւ դատապարտվել։
Ընդհանուր առմամբ, 2014 թվականից նախագահին «վիրավորելու» փաստերով հարուցվել է 160 169 գործ, որից 12 881-ն ավարտվել է մեղադրական դատավճռով։
Թուրքիայում գնաճը հասել է իր ամենաբարձր մակարդակին 1990-ականներից ի վեր այն բանից հետո, երբ կենտրոնական բանկը նվազեցրել է տոկոսադրույքները անցյալ տարվա վերջին եւ դրանից հետո հրաժարվել է բարձրացնել դրանք: Գների աճը եւ կառավարության քաղաքականության նկատմամբ անվստահությունը հանգեցրել են լիրայի կտրուկ վաճառքի: