Եվրոպայում էներգիայի նորմավորման սպառնալիքը դեռեւս իրական է, քանի որ գերմանական կարգավորիչը նախազգուշացրել է, որ այս ձմռանը հավանաբար գազի անբավարարություն կլինի:

Ճգնաժամն ազդում է տնտեսության եւ շուկաների վրա։ Գերմանիայի կառավարությունը պատրաստ է բաժնեմաս գնել գազի խնդրահարույց մատակարար VNG AG-ում այն բանից հետո, երբ Uniper SE-ն այս շաբաթ հայտարարել է, որ քննարկում է ընկերության ազգայնացման հարցը, հայտնում է Bloomberg-ը։

Ֆրանսիական Electricite de France SA-ն հայտարարել է, որ ճգնաժամը այս ձմեռվանից հետո էլ կարող է շարունակվել:

Այս շաբաթ Եվրահանձնաժողովը հրապարակել է արմատական միջամտության պլաններ, ներառյալ սպառողների համար 140 միլիարդ եվրոյի հավաքում էներգետիկ ընկերությունների եկամուտներից, էլեկտրաէներգիայի առավելագույն պահանջարկի պարտադիր սահմանափակումներ եւ իրացվելիության բարձրացում: Սակայն առեւտրականները կշռադատում են այս քայլերի արդյունավետությունը, քանի որ ջեռուցման սեզոնի պաշտոնական մեկնարկին ընդամենը մի քանի շաբաթ է մնացել:

Գերմանիայի էներգետիկ կարգավորիչը արդյունաբերական սպառողներին կոչ է արել նվազեցնել իրենց գազի սպառումը` որպես պարտադիր նորմավորումից խուսափելու ջանքերի մի մաս: Դաշնային ցանցային գործակալությունը մշակել է գազի աճուրդի մոդել, որով ընկերությունները կարող են առաջարկել մի գին, որի դեպքում իրենք պատրաստ կլինեն նվազեցնել սպառումը:

Գերմանիան, ամենայն հավանականությամբ, այս ձմռանը կբախվի գազի սակավության «ալիքների», Handelsblatt-ին ասել է երկրի էներգետիկայի կարգավորող մարմնի նախագահ Կլաուս Մյուլերը։ Նրա խոսքով, դեռ հստակ ծրագիր չկա, թե որ ոլորտների մատակարարումները կնորմավորվեն։ «Եթե շատ ցուրտ ձմեռ լինի, մենք խնդիրներ կունենանք»։