Բաքուն չի պատրաստվում «Ղարաբաղի հայերի ճակատագիրը քննարկել» Հայաստանի իշխանությունների հետ, երեկ Եվրամիության դիվանագետների հետ հանդիպմանը հայտարարել է նախագահ Իլհամ Ալիևը: Միաժամանակ, նա հրապարակավ կշտամբել է Ռուսաստանին ու պնդել, թե այս հարցի շուրջ բանակցություններ չեն վարելու նաև «Մոսկվայից ուղարկված Ռուբեն Վարդանյանի հետ», ով վերջերս նշանակվեց Ղարաբաղի պետնախարար:
«Մենք պատրաստ ենք խոսել Ղարաբաղում ապրող հայերի հետ, բայց ոչ Մոսկվայի կողմից ուղարկված [Ռուբեն] Վարդանյանի նմանների, որի գրպանում ռուս ժողովրդից գողացված միլիարդներն են։ Նրան Մոսկվայից ուղարկել են հստակ օրակարգով», - ասել է նա:
Ալիևի օրակարգը հստակ է՝ նա նույնիսկ Ադրբեջանի կազմում որևէ սուբեկտություն չի պատկերացնում ԼՂ-ի համար ու ըստ այդմ՝ դեմ է Ստեփանակերտ- Բաքու դիալոգի միջազգային մեխանիզմի ստեղծմանը, ինչի մասին շատ հաճախ հիշատակում են անում Բրյուսելում ու Վաշինգտոնում:
Ադրբեջանի նախագահը երեկ հստակ հասկացրել է, որ դեմ է նաև հայ-ադրբեջանական հարաբերությունների կարգավորման ռուսական առաջարկություններին ու հենց այս համատեքստում է նա հիշել Ռուբեն Վարդանյանի անունը:
Այնուամենայնիվ, Ալիևի այս «հիշեցումը» որոշակի լեգիտիմ սուբեկտություն է տվել Ռուբեն Վարդանյանին, ով շտապել է արձագանքել Ալիևի խոսքերին:
Արձագանքելով Ադրբեջանի նախագահի այսօրվա հայտարարություններին ու ուղջունելով Իլհամ Ալիևի՝ Լեռնային Ղարաբաղի հետ «ուղիղ երկխոսություն սկսելու ձգտումը», Վարդանյանն իր ֆեյսբուքյան էջում գրել է. «Արցախն այս գործընթացում պետք է սուբյեկտ լինի: Կարծում եմ՝ լիովին համապատասխանում եմ պարոն Ալիևի առաջադրած բանակցողի չափանիշին՝ «ապրում է Ղարաբաղում և ցանկանում է ապրել այնտեղ»։
Ակնհայտ է, որ Բաքուն ցանկանում է կլանել Արցախը, իսկ Ստեփանակերտը չի պատրաստվում զիջել իր ինքնիշխանությունը և ինքնին հասկանալի է, որ այս պահին դժվար է որևէ կոնստրուկտիվ դիալոգ պատկերացնել Ադրբեջանի ու Արցախի միջև: Մյուս կողմից, Ալիև- Վարդանյան երեկվա հեռակա «երկխոսությունն» անուղղակիորեն փաստում է ԼՂ սուբեկտության մասին, ինչը քաղաքական ու դիվանագիտական կապիտալիզացիայի անհրաժեշտություն ունի:
Վահրամ Բագրատյան