Մեծ Բրիտանիայի պաշտպանության նախարար Բեն Ուոլլեսը, որը Բորիս Ջոնսոնի հրաժարականից հետո համարվում էր վարչապետի պաշտոնի հավանական թեկնածուներից մեկը, այսօր հայտարարել է, որ չի մասնակցելու իշխող կուսակցության և կառավարության ղեկավարի պաշտոնների համար պայքարին։
«Ընտանիքիս անդամների և գործընկերներիս հետ քննարկումներից հետո, որոշել եմ չմասնակցել իշխող կուսակցության ղեկավարի համար պայքարին։ Ես շնորհակալ եմ գործընկերներիս, որոնք աջակցում են ինձ։ Սա հեշտ որոշում չէր, բայց ես կենտրոնացած եմ ներկայիս աշխատանքի վրա՝ այն է ապահովել մեր հզոր երկրի անվտանգությունը», - Թվիթերում գրել է Ուոլլեսը։
YouGov հետազոտական ինստիտուտի սոցիոլոգիական հարցումների համաձայն, Ուոլլեսին ընտրողները համարում են Ջոնսոնի ամենահավանական փոխարինողը։
The Spectator ամսագիրը Ուոլլեսի հայտարարությունից հետո տարածել է բուքմեյքերական ընկերությունների թարմ կանխատեսումները, համաձայն որոնց, այժմ վարչապետի հավանական թեկնածուն նախկին ֆինանսների նախարար Ռիշի Սունակն է։ Նրան հաջորդում են առևտրի նախարարի տեղակալ Պեննի Մորդոնտը և արտգործնախարար Լիզ Թրասսը։ Մրցապայքարին մասնակցելու մասին պաշտոնապես հայտարարել են առայժմ 4 քաղաքական գործիչներ՝նախկին ֆինանսների նախարար Ռիշի Սունակը, Հանրային պալատի արտաքին գործերի կոմիտեի ղեկավար Թոմ Թուգենդհատը, Անգլիայի և Ուելսի գլխավոր դատախազ Սյու-Էլլեն Բրեյբերմենը և պատգամավոր Քեմի Բեյդնոկը։