Փաստերը փոխել հնարավոր չէ, մեր պատմության մեջ ականատես եղանք մի իրադարձության, որն աննախադեպ է։ Հայաստան պետության առկայության պայմաններում տեղի ունեցավ հայերի մի նոր ցեղասպանություն։ Հայաստանն այս վարչախմբով միայնակ թողեց Արցախը։ Այս մասին այսօր Կառավարության հետ հարցուպատասխանի ժամանակ ասաց ԱԺ «Հայաստան» խմբակցության պատգամավոր Արմեն Ռուստամյանը՝ դիմելով Նիկոլ Փաշինյանին։
Ռուստամյանը հիշեցրեց Փաշինյանի հայտարարությունները, որոնք, իր կարծիքով, Արցախի դեմ էին։
«Կա՛մ փոխեք Ադրբեջանի հայելային քաղաքականությունը, հրաժարվեք այդ քաղաքականությունից, կա՛մ հեռացեք․ ո՞րն է ձեր հետագան»,- հետաքրքրվեց նա։
Փաշինյանն էլ արձագանքեց, թե ԼՂ-ին մենակ թողնելու մեղադրանքն ամենաանարդարն է։
«ԼՂ-ն բլոկադայից առաջ և հետո ինքնապաշտպանության առումով ոչնչի պակաս չի ունեցել, սա իմ կարծիքն է։ Ես չեմ ասել, որ չեմ միջամտելու, ես ասել եմ, որ նպատակը Հայաստանին ռազմական գործողությունների մեջ ներքաշելն է, որի մեջ չենք ներքաշվելու, բայց մենք քաղաքական ամբողջական աջակցություն ենք ներկայացրել ԼՂ-ին։ Մենք միջազգային օգնություն ենք ակնկալում, բայց ձեռք մեկնած աշխարհով ման չենք գալիս, թե մեզ 2 կոպեկ գցեք, որ մեր եղբայրներն ու քույրերը սովահար չլինեն»,-ասաց Փաշինյանը։
Փաշինյանը խոսեց նաև իր այն հայտարարության մասին, երբ ասել էր՝ ԼՂ քաղաքացիական բնակչությանը ուղիղ վտանգ չի սպառնում։
«Իմ հայտարարության մոտիվացիան եղել է այն, որ այդ մարդկանց նկատմամբ սպառնալիքները չխստացվեն, կարող էի էնպիսի հայտարարություն անել, որ էդ պայմաններում ևս 300 հոգի զոհվեր, դրանից ոչ մի բան չէր փոխվի: Իմ խնդիրը եղել է այս՝ անեմ հայտարարություն, որ որևէ մեկի գլխից մազ չպակասի և ես ուրախ եմ, որ գուցե իմ հայտարարության շնորհիվ 105 հազարից ավելի մեր քաղաքացիներ դժվար, տառապալից, հոգեբանական ծանր վիճակում եկել, հասել են ՀՀ և ուրախ եմ, որ իրենց պատշաճ ընդունելու հնարավորություն ունենք այսօր»,- ասաց նա։
Ռուստամյանն էլ արձագանքեց․ «Դուք ձեր պատասխանից գո՞հ եք»։
Մանրամաները՝ տեսանյութում